Timor Post (21/03/2021)—Moras daet COVID-19 iha Timor Leste seidauk rejista ema mate, maibé husik tiha ona susar no terus oioin ba timoroan sira no marka itória moruk ida iha família Octaviano dos Santos.
Iha loron 20/03/2021, kalan boot, Octaviano rona nia ferikoan ne’ebé foin kous fulan haat iha isin sira nia oan ba dahuluk abortu iha sala izolamentu ne’ebé governu prepara iha Tasi Tolu parte loromonu kapital nasaun nian.
Hanesan laen, Octaviano la simu tebes ho realidade moruk ida ne’e. Maske ho forsa hotu ne’ebé Octaviano iha maibé labele halo buat ida hodi salva nia oan husi situasaun ne’ebé nia feen hasoru tanba nia mós kumpri hela kuarentena obrigatóriu.
Octaviano triste tebes. Iha kuarentena ne’ebé governu prepara iha Hotel Novo Horizonte, Metiaut, Octaviano ba Jornalista Timor Post lansa krítika maka’as hasoru ekipa médiku no polísia sira.
“Sira teste swab ba ha’u nia ferikoan dehan nia pozitivu, ha’u laiha fali. Entaun ha’u dehan ba sira ha’u mak loron kalan hamutuk ho nia nusa ha’u la pozitivu fali,” Octaviano hatete.
Iha momentu ekipa konjunta ba tula nia ferikoan, nia rasik preokupa tebes. Nia konsege dehan ba ekipa sira katak, nia lakohi hatene kona-ba saida mak akontese ba nia ferikoan ho nia oan tanba durante sira ba konsulta mós doutor sira dehan nia ferikoan fraku (kandugan lemah).
“Antes sira atu lori ba ha’u husu ba doutor sira, se buat ruma mak akontese ba nia doutora sira responsavel ka la’e, entaun sira dehan responsavel tanba iha izolamentu ne’e buat hotu-hotu kompletu,” Octaviano haktuir.
Maske nune’e, realidade oin seluk. Octaviano dehan, hodikalan nia simu telefone husi nia ferikoan dehan abortu no ambulánsia evakua ona ba Sentru Izolamentu Vera Kruz.
Entretantu Octaviano haktuir, nia ferikoan halo duni kontaktu ho sira nia viziñu médiku ida ne’ebé dehan pozitivu hotu ba COVID-19. Maibé nia nafatin admira maka bainhira médiku sira ba halo swab rejultadu ba nia ho nia ferikoan la hanesan.
Nune’e, iha loron 19/03/2021, ekipa konjunta tula nia ferikoan ba izolametu no nia doutor sira haruka auto kuarentena. Maibé iha loron 20/03/2021, nia atu ba hola foos iha loja Audian, derepente de’it polísia ba kaer nia hodi lori ba sulan iha kuarentena Hotel Novu Horizonte.
Ho situasaun ne’ebé iha, Octaviano husu ba autoridade sira atu autoriza nia ba haree nia ferikoan iha izolamentu Vera Kruz.
Entretantu informasaun ne’ebé Timor Post asesu iha izolamentu Vera Kruz haktuir, médiku sira halo ona intervensaun no agora pasiente iha hela kondisaun estavel.
Jornalista Jaime Pires
Editór Noémio Falcão
702 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
Sorry, there was a YouTube error.