Timor Post (17/03/2021)- Sentru Integradu Jestaun Krize (SIJK), husik hela sidadaun na’in rua iha kuarentena Otél Novo Horizonte maski períodu kuarentena nian termina tiha ona.
Sidadaun na’in rua ne’e autoridade asegura iha Postu Administrativu Natarbora Munisípiu Manatutu hafoin serka sanitáriu iha Munisípiu Covalima implementa.
“Sira kaer ami iha Natarbora iha loron 2 fulan Marsu, hodi lori ami mai iha kuarentena ida ne’e”, hatete Domingos Pereira ba Timor Post iha fatin kuarentena Hotel Novo Horizonte, Metiaut, kuarta (17/03).
Domingos adianta katak sira kuarentena semana rua ona, teste swab dala rua ona rezultadu negativu.
Sidadaun ne’e konfesa sira ninia família iha dili laiha no hein parte kompetente lori hikas sira fila ba munisípiu.
“Ami nia família iha ne’e mós laiha, agora ami na’in rua atu ba ne’ebé, horiseik Polísia mai tula ami ba tiha eskuadra Bekora, maibé ami família laiha entaun sira tula fali ami fali kuarentena”, espresa sidadaun ne’e.
Nia tenik tan katak, karta remata kuarentena doutór entrega tiha ona iha loron Tersa (16/3) maibé sira nia família iha Dili laiha atu horik ba nune’e mós Dili serka sanitaria hotu labele sai, sai susar ba sira enkuantu karta autorizasaun hodi fila ba sira nia Munisípiu mós SIJK la entrega.
Relasiona ho situasaun ne’eb’e sira enfrenta nia husu ba governu no SIJK oinsá transporta fali sira ba munisípiu hamutuk ho família.
Sidadaun na’in rua ne’e PNTL Komandu Munisípiu Manatutu detein iha Postu Administrativu Natarbora, iha momentu ne’ebé Munisípiu Kovalima sei implementa serka sanitaria no konfinamentu obrigatóriu.
Sidadaun Domingos Pereira no Bruno Ximenes nia loron kuarentena remata iha loron segunda (15/03), ne’e, maibé liu ona loron rua sira kontinua horik hela iha Otél Novo Horizonte Meti-Aut Dili.
Jornalista : Jaime Pires
Editor : Mariano Martins
625 total views, 3 views today
Oinsa Ita nia Reaksaun iha Notisia Nee?
You have reacted on “Sidadaun Na’in-2 Sente Abandonadu iha Kuarenten…”
Bele hare Video Seluk :
Subscribe to Timorpost
