Timor Post (15/03/2021)—Governu liuhusi Konsellu Ministru (KM) hafoin halo análiza ba aprezentasaun husi koordenadór sira husi Sentru Integradu Jestaun Krize kona-ba pontu situasaun epidemiolójiká iha Timor-Leste, aprova ona projetu Rezolusaun Governu nian ba manutensaun serka sanitária ida iha Munisípiu Dili, to’o tuku 23:59 iha loron 2 fulan-abril tinan 2021, no munisípiu Baukau no Vikeke to’o loron 29 Marsu.
Informa hosi Ministru Prezidensiál Konsellu Ministru hosi komunikadu katak, rezolusaun Governu nian ne’ebé mantein impozisaun serka sanitária nune’e, kontinua taka postu fronteira ne’ebé instala iha área munisípiu ne’e no bandu sirkulasaun ema nian entre munisípiu ne’e ho sirkunskrisaun administrativa sira-seluk, exetu iha kazu ho fundamentu forte ho razaun ba siguransa, saúde públika, umanitária ka seluk ne’ebé revela nesesária atu hala’o ba interese públiku nian” sita iha dokumentu refere.
No hatutan iha komunikadu katak, ema no sasán ne’ebé maka hetan lisensa atu tama no sai husi Munisípiu Dili, obrigatoriamente atu tranjita liuhusi sentru kontrolu integradu, ne’ebé situadu iha estrada rai leste, sentru no oeste, no iha postu fronteira tasi no aérea.
Sentru kontrolu hirak ne’e funsiona iha segunda, kuarta no sesta, entre tuku 06:00 dadeer to’o tuku 16:00, no ninia funsionamentu asegura husi ekipa funsionáriu, ajente ka traballadór sira administrasaun públika nian ne’ebé nomeia husi Ministru Interiór, Ministra saúde, Ministru Administrasaun Estatál no Ministru Agrikultura ne’ebé informa ba Diretór Sentru Integradu Jestaun Krize kona-ba identidade no sira-nia kontaktu.
Alein-de nee konsellu ministru mós aprova projetu Rezolusaun Governu nian ne’ebé mantein impozisaun konfinamentu domisiliáriu jerál ba ema hotu ne’ebé mak oras ne’e daudaun hela iha Munisípiu Dili, ne’ebé kontinua hela iha sira nia uma ka iha sira nia alojamentu temporáriu.
Rezolusaun refere bandu atu sirkula transporte públiku iha área sira hotu iha Munisípiu Dili, liuliu, mikrolete, bís kota no taxi sira, taka ba públiku estabelesimentu komersiál, industriál, artezanál no prestasaun servisu setór privadu ekonomia nian sira hotu ne’ebé dezenvolve atividade iha munisípiu Dili, esesaun estabelesimentu komersiál sira ne’ebé fa’an ai han, bee no sasán esensiál seluk, no instituisaun finanseira.
Ba restaurante no ne’ebé hanesan bele fornese de’it hahán take away ka lori ba uma, atu han iha uma ka iha fatin alojamentu temporáriu ka lori ba uma ou otél. Ema ne’ebé hela iha otel tenke han iha nia kuartu rasik.
Enkuantu merkadu Munisipál Dili, Manleuana no Taibesi kontinua funsiona no operadór no utente ida-idak molok asesu ba merkadu tenke fase liman no kontinua uza máskara hodi taka inus no ibun nune’e mós mantein distánsia pelumenus metru ida ho ema seluk ne’ebé la hela iha ekonomia komún. Bainhira forsa seguransa sira hetan katak labele mantein distánsia sosiál pelumenus metru ida entre utente sira, sei impede utente foun sira atu asesu ba resintu merkadu to’o númeru utente respeitu ba distánsia ne’e.
Ba vendedór ambulante sasán ka servisu ba primeira nesesidade, liuliu produtu ai han, espesialmente modo tahan, nune’e mós komersiante ne’ebé hala’o atividade iha merkadu diak liu kontinua uza máskara hodi taka inus no ibun, tenke fase liman beibeik, no mantein distánsia pelumenus metru ida ho ema seluk hodi evita halibur malu hamutuk iha fatin ne’ebé hala’o sira nia atividade.
Bandu hala’o serimónia funebre ne’ebé evolve ema liu na’in sanulu, ne’ebé iha serimónia ne’e tenke uza máskara oin hodi taka inus no ibun no mantein distánsia pelumenus metru ida ho ema seluk ne’ebé iha serimónia ne’e.
Autoridade polísia nian sira fiskaliza kumprimentu ba regra sira ne’ebé iha Rezolusaun Governu nian ne’e no adverte infratór sira katak sira nia persisténsia hodi la kumpre bele hametin pratika krime dezobediénsia.
Autoridade polisiál sira komunika ba Ministériu Públiku identidade ema ne’ebé, hafoin adverténsia prevee iha númeru anterior, kontinua la respeita ba regra prevee iha Rezolusaun Governu nian.
Iha kazu ne’ebé regra sira prevee iha Rezolusaun Governu ne’e la respeita husi ema rai-li’ur, autoridade polisiál sira komunika sira nia identidade ba Servisu Migrasaun.
Konsellu Ministru mós aprova projetu Rezolusaun Governu nian ida ba impozisaun serka sanitáriano konfinamentu obrigatóriu, iha Munisípiu Baukau no Vikeke, to’o loron 29 fulan-marsu, ne’ebé bandu sirkulasaun ema nian entre munisípiu ne’e rasik no ho sirkunskrisaun administrativa sira-seluk, exetu iha kazu ho fundamentu forte ho razaun seguransa públika, saúde públika, asisténsia umanitária, manutensaun sistema abastesimentu públiku ka ba realizasaun interese públiku.
Bandu mós hala’o sirkulasaun ema nian entre munisípiu ne’e rasik ho sirkunskrisaun administrativa sira seluk, exetu iha kazu ho fundamentu forte ho razaun seguransa públika, saúde públika, asisténsia umanitária, manutensaun sistema abastesimentu públiku ba interese públiku nian, regra aplikasaun sira serka sanitária no konfinamentu nian iha munisípiu rua ne’e hanesan ho Munisípiu Dili nian ho ajustamentu no adaptasaun ba realidade munisípiu rua ne’e nian.(***)
868 total views, 6 views today
Bele hare Video Seluk :
Subscribe to Timorpost
