Timor Post (14/03/2021)—Mosu barullu no tuda iha Aldeia 03, Suku Fatuhada, Postu Administrativu Don Aleixo, Munisípiu Dili, bainhira ekipa médiku ba halo evakuasaun ba pasiente COVID-19 na’in tolu.
Komunidade iha área Ambulásia liu ne’e hakilar mosu lia katak la fiar moras COVID tanba sempre ba tula pasiente sira iha kalan. Hakilar dadauk no fatuk tuda husi nakukun laran ba área Ambulánsia nian halo ekipa.
Santina da Costa nu’udar komunidade ida iha área ne’e via telefone ba Timor Post haktuir, ambulánsia ne’e tama husi estrada boot ba, mosu duni situasaun pániku iha área ne’eba.
Timor Post halo konfirmasaun ho Xefe Suku Fatuhada, Marcelino Soares, rekoñese iha duni barullu iha Aldeia 03, Maibé, nia fó sala ba ekipa husi saúde nian tanba laiha koordenasaun antes ba tula pasiente sira. Tuir Xefe Suku, lolo’os bainhira Laboratórium Nasionál identifika ona pasiente pozitivu tenke koordena ho sira atu tun hamutuk ba terrenu.
Nia sujere atu ekipa ne’ebé tun ba baze hamutuk maka ekipa médiku akompaña husi seguransa no mídia sira.
Meius ne’e nia sente di’ak liu tanba sira mak hatene liu situasaun iha baze, maibé mós nia husu atu tenke prepara fasilidade prevensaun sira atu sira mós uza.
Parte ida, Xefe Marcelino dehan, hala’o evakuasaun iha kalan ne’e risku boot tebes. Tanba ne’e nia husu atu Sentru Integradu Jestaun Krize (SIJK) presiza avalia kestaun ida ne’e.
Maske nune’e, Xefe Suku Marcelino kontinua husu ba komunidade sira atu koopera ho parte saúde no seguransa sira atu nune’e bele hala’o servisu ba kombate surtu COVID-19 iha Timor Leste.
“Ha’u sempre sai tama komunidade sira, ha’u husu ita boot sira tenke kuidadu an. Moras ne’e ita la hatene, tebes ka bosok ita la hatene, ema saúde mak hatene. Ita haree ba nasaun sira seluk ema mate barak,” Xefe Marcelino subliña.
Ba Timor Post, Vise-Koordenadóra Forsa Tarefas Prevensaun no Mitigasaun Covid-19, Doutora Odete da Silva Viegas ba Timor Post rekoñes iha duni akontesimentu ne’e, maibé ho situasaun agora nia parte sei tetu atu halo de’it evakuasaun iha loron.
Doutora Odete haktuir, baibain ne’e ekipa sira ba halo evakuasaun ba pasiente sira depois de rejultadu teste husi laboratórium
“Baibain, foti depois de CI, kalan mos foti. Maibé haree ba situasaun agora sei foti loron de’it ona,” Doutora Odete subliña.
Entretantu tuir dadus ne’ebé Sala Situasaun SIJK fó sai, ohin, pasiente COVID-19 sa’e ba 97. Pasiente na’in-3 ne’ebé kalan ne’e foti iha Fatuhada seidauk bele sura hamutuk tanba sei hein relatóriu ofisiál husi SIJK iha loron Segunda (15/03/2021).
Tuir mai KONFERÉNSIA IMPRENSA
14 MARSU 2021, 17H30
Dr. Rui Maria de Araújo
Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS)
Ohin, loron 14 marsu 2021, hodi Centro Integrado Gestão de Crises-Sala Situação (CIGC-SS) nia naran, hakarak hato’o ba jornalista no ba públiku tomak, informasaun hanesan tuirmai:
✅DADUS JERAL:
1️⃣Kazu foun: 18
2️⃣Kazu rekuperadu: 3
3️⃣Kazu ativu: 97
▶️Kazu 18 ohin, iha mane na’in 4, feto na’in 14
▶️Labarik ho idade 12 mai-kraik iha na’in 4
▶️Idade husi 16 to’o 44 iha na’in 14
▶️Hotu-hotu asintomátiku, ka lahatudu sintomas.
✅EVOLUSAUN SURTU COVID-19 IHA MUNISÍPIU DÍLI
Husi total kazu foun iha leten, sira nain 14 iha Munisípiu Díli, ho detalles hanesan tuir mai:
↗️Kazu pozitivu 2, husi Aldeia Mate-restu, Suku Vila-Verde, Postu Administrativu Vera Cruz. Pozitivu hirak ne’e kontaktu-besik ho kazu ida ne’ebe loron rua liubá relata husi vijilánsia sentinela iha Sentru Saúde Formoza.
↗️Kazu pozitivu 7, husi Aldeia Lurumata 03, Suku Fatuhada, Postu Administrativu Dom Aleixo. Pozitivu hirak ne’e kontaktu-besik ho kazu ida ne’ebe loron rua liubá relata husi vijilánsia sentinela iha Sentru Saúde Formoza.
↗️Kazu pozitivu 1, husi Aldeia Frekat, Suku Bairro Pité, Postu Administrativu Dom Aleixo. Pozitivu hirak ne’e kontaktu-besik ho kazu ida iha cluster Ministériu Finansas.
↗️Kazu pozitivu 1, husi Aldeia Fomento 03, Suku Comoro, Postu Administrativu Dom Aleixo. Pozitivu ida ne’e kontaktu-besik ho kazu konfirmadu ida husi Cluster Aldeia 4 de Setembru, ne’ebé mós hetan transmisaun husi nia la’en husi Cluster MTC.
↗️Kazu pozitivu 1, husi Aldeia Teki-Teki, Suku Bairro Pite. Postu Administrativu Dom Aleixo. Pozitivu ida ne’e kontaktu-besik ho kazu konfirmadu ida husi Cluster Aldeia 4 de Setembru, ne’ebé mós hetan transmisaun husi nia la’en husi Cluster MTC.
↗️Kazu pozitivu 1, husi Aldeia Aimutin, Suku Comoro, Postu Administrativu Dom Aleixo. Pozitivu ida ne’e kontaktu-besik ho kazu konfirmadu ida husi Cluster Aldeia 4 de Setembru, ne’ebé mós hetan transmisaun husi nia la’en husi Cluster MTC.
↗️Kazu pozitivu 1, husi Aldeia Tasi Mean, Suku Comoro, Postu Administrativu Dom Aleixo. Pozitivu ida ne’e kontaktu-besik ho kazu konfirmadu ida husi Cluster Emergency Obstetrics and Neonatal Care Ospitál Nasionál.
Ho nune’e, kazu detetadu ka pozitivu iha Munisípiu Dili husi 7 marsu to’o ohin hamutuk hotu 67.
✅EVOLUSAUN SURTU COVID-19 IHA MUNISÍPIU BAUCAU
1️⃣Amostra hirak ne’ebé foti iha dia 10 no 11 marsu iha Baucau, hamutuk hotu 132. Horiseik relata ona katak 37 maka sei hein rezultadu husi laboratoriu, maibé ohin hakarak relata katak 37 ne’e negative hotu.
2️⃣Husi kazu konfirmadu 2 ne’ebé horiseik ralata, no mós vijilánsia sentinela, ekipa konjunta saúde rekolle amostra hamutuk 119. Husi amostra 119, na’in 4 maka pozitivu no sira ne’e hotu profisionál saúde iha Sentru Saúde Wailili. Ho nune’e, iha Munisipiu Baucau, iha Cluster rua:
↗️Cluster Caibada: kazu detetadu 2 (ida iha 2 Marsu, ida horiseik, dia 13 de Marsu)
↗️Cluster Sentru Saúde Wailili: Kazu detetadu 4.
3️⃣Estudante ema Baucau, n’ebé studu Instituto Siensia Saúde iha Díli, hela iha Aldeia Fomento 3, Suku Comoro. Husi atividade buka tuir ninia kontaktu-besik maka hetan kazu konfirmadu foun ne’ebé ohin relata ona iha Munisípiu Díli
4️⃣Estudante medisina ne’ebé halo estájiu iha Óspitál Referénsia Eduardo Ximenes Baucau, ne’ebé detetadu pozitivu horiseik, iha 7 marsu, domingo liubá, halo viájen husi Díli ba Baucau iha tuku 3h30 loraik, husi terminal Becora. To’o iha Vemasse, bis (transporte públiku) ne’bé nia sa’e, hetan dezastre. Bis ne’e naran Albatroz. Hafoin, pasajeiru sira hotu sa’e fali bis seluk husi Vemasse ba Baucau. Bis ida ne’e nia lahatene naran.
Apela ba populasaun ne’ebé sente-an sa’e bis rua ne’e iha 7 marsu husi Díli bá Baucau, inklui hira ne’e tun husi bis ne’e molok to’o Vemase ka Baucau, favór aprezenta-an iha autoridade saúde sira iha Sentru Saúde besik-liu atu bele hetan atendimentu.
✅ESPLIKASAUN ADISIONÁL
1️⃣Fo’o hanoin ba populasaun katak Rezolusaun Governu Nº12/2021, 8 de Marsu kona-ba serka sanitaria iha Munisípiu Díli, proibi ema atu tama sai husi Díli. Hotu-hotu tuur hakmatek iha fatin. Autoridade ne’ebé bele autoriza ema nia movimentu sai husi no tama mai Munisípiu Díli maka Brigadeiro Jenerél Aluk, Diretór Sentru Integradu Jestaun Krize.
Resolução Governo ne’e mós obriga sidadaun hotu iha sidade Díli, atu halo konfinamentu domisiliáriu jerál. Ida ne’e signifika, hela iha uma, labele sai, sai deit wainhira presiza tamba moras, hola hahán, ou sira ne’ebé halo serbísu esensiál.
2️⃣Informa mós ba públiku katak hahú horiseik, dia 13 marsu, hamosu ona korredor abastesimentu ba sasán atu sai husi Díli, no tama mai Díli.
Pedidu autorizasaun hotu tenki diriji ba Brigadeiru Jenerál João Miranda ‘’Aluk’’, Diretór Sentru Integradu Jestaun Krize-Sala Situação.
3️⃣Aproveita mós esplika ba populasaun katak tuir númeru 5, Rezolusaun Governu Nº12/2021, 8 de Marsu, kona-ba serka sanitaria iha Munispiu Dili, ema bele pratíka desportu ka ezersisu fíziku individuál, maibé labele la’o iha grupu durante ezersísiu, labele halibur malu durante ezersísiu, no labele mós pratíka desportu iha grupu, tamba aglomerasaun ka halibur malu iha grupu bele hamosu risku boot ba transmisaun moras COVID-19.
✅APELU
Apela ba populasaun Timor-Leste tomak, liu-liu iha Munisípiu Díli no Baucau atu nafatin hakmatek. Maski kazu konfirmadu aumenta ba bebeik, no naklekar mós ona ba Munisípiu Baucau, husu atu tuur nafatin hakmatek, atu nafatin matan-moris neon na’in, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona:
➡️Uza máskara
➡️Fase liman beibeik ho sabaun ka dezinfetante ruma
➡️Evita kose liman ba matan, inus ho ibun
➡️Wainhira kumprimenta malu, lapresiza ka’er liman, bensa-liman, rei-malu ka haku’ak malu
➡️Evita halibur malu barak
➡️Hamriik ka tur dook husi ema seluk, mínimu metru ida ho balun.
Jornalista Maria Lízia/Jaime Pires
Editór Noémio Falcão
649 total views, 3 views today
Bele hare Video Seluk :
Subscribe to Timorpost
