ADVERTISEMENT

Lezada La Kopera, Ministériu Públiku Presiza Avalia Akuzasaun Hasoru Eis Padre Richard

Timor Post - Raeoa
  • Share
Imajen ne'e hatudu Eis Padre Richard seidauk hetan akuzasaun. Nia ho labarik kbiit laek sira ne'ebe nia halibur no hakiak haksolok hamutuk no tebe tuir kultura Atoni Oekusi nian.

Timor Post (12/03/2021)— Labarik sira iha orfonatu Topu Honis halai namkari bainhira haree hetan membru polísia na’in-4 husi komandu Rejiaun Autónomu Espesiál Oekusi Ambeno (RAEOA) hala’o vizita ho órden Ministériu Públiku nian.

Informasaun ne’ebé Timor Post asesu haktuir, membru polísia na’in-4 ne’e ba Topu Honis tuir mandatu husi Ministériu Públiku atu haree labarik sira nia situasaun liga ho kazu pedofilia ne’ebé órgaun judisiál ne’e rasik mak halo akujasaun no reprejenta lezada sira.

Maske nune’e, Diretora Orfonatu Topu Honis mós hakfodak ho prezensa membru polísia sira halo labarik sira halai namkari.

Situasaun ne’e akontese iha loron Kinta (11/03/2021) maizumenus oras tuku 11 dader iha Topu Honis Kutet.

Labarik sira haree polísia sira trauma tanba uluk sira hetan visum obrigatóriu.

Liliana Tarung rekoñese membru polísia na’in-4 ne’e kompostu husi feto rua – mane rua maka hala’o vizita ba ho farda kompletu sein armas. Nia dehan la koñese de’it membru na’in rua husi sira na’in haat.

“Bainhira kareta polísia nian foin maka to’o portaun oin ne’e, labarik sira halai hotu tuir portaun kotuk nian,” Liliana haktuir.

Nia dehan, konsege konversa duni ho membru polísia sira hodi fó mós informasaun katak durante ne’e labarik ho inan faluk sira iha orfonatu moris hakmatek hela. Maibé labarik sira maka trauma ho polísia.

Entretantu Defeza husi Eis Padre Richard Dasbach nu’udar arguidu ba kazu pedofilia ka halo violasaun seksuál hasoru labarik sira iha orfonatu Topu Honis, Advigadu Miguel Faria, rona informasaun ne’e subliña, normalmente Ministériu Públiku ka Defeza ba arguidu sira maka la hetan ona konfiansa ka la kopera husi kliente sira ne’e presiza halo avaliasaun.

“Hanesan advogadu mos ami nia kliente la fiar ona ami, ami ko’alia ho nia maka nia fila kotuk ona, ne’e ami presiza halo avaliasaun ba ami nia servisu. Nune’e mós hanesan Ministériu Públiku, nia ba bolu labarik mak labarik sira hala’I lakon hotu ne’e presiza halo avaliasaun ba nia akujasaun,” Advogadu Miguel Faria subliña ba Timor Post.

Prosesu julgamentu ba eis Padre Richard hahú prosesu julgamentu iha loron Tersa 22-23 Fevereiru liuba.

Prosesu julgamentu ne’e taka ba públiku, no seidauk iha desijaun final husi Tribunal Rejiaun Oekusi tanba Tribunal presiza rona mós lezada ho sasin sira iha julgamentu tuir mai ne’ebé marka ona ba loron 23 fulan Marsu ne’e.

Labarik no kbiit la’ek sira kuaze atus ne’ebé hamahan-an iha Orfonatu Topu Honis tanis tuir Eis Padre Richard iha Portu Mahata, Oekusi, bainhira eis padre amerikanu ne’e akompaña husi Líder Nasionál Kayrala Xanana Gusmão fila hikas ba Dili.

Richard iha karreta laran hiit de’it liman ba labarik no ema hotu ne’ebé hakarak tebes hasoru Richard. Sentimentu saudades husi labarik sira ba Richard hatudu mós bainhira aniversáriu Richard ba-dala 84, iha Topu Honis família boot iha Orfonatu ne’e halo selebrasaun.

“Labarik sira saudades tebes. Labarik no inan faluk sira tanis,” Atual Diretora Topu Honis, Liliana Tarung haktuir ba Jornalista Timor Post no dehan sira konsidera Richard hanesan sira nia aman ne’ebé funda orfonatu Topu Honis hodi halibur no tau matan ba sira.

Diretora Liliana haktuir, labarik sira halibur iha orfonatu ne’e inklui sira oan-ki’ak, balun inan-aman kbiit laek no balun abandonadu. Nune’e mós inan faluk sira maioria laiha kbiit.

“Labarik sira barak dezde kiik kedas hela iha ne’e, no agora balun ba ona eskola sekundáriu,” Liliana haktuir.

Kona-ba prosesu justisa ne’ebé Richar hasoru, Liliana subliña, iha konspirasaun ne’ebé involve ema lubuk ida hodi hases Richar husi orfonatu Topu Honis. Meius barak ema halo hodi hamonu Richar maibé la konsege ikus mai ho akujasaun kona-ba pedofilia.

Tanba ne’e, Liliana hatete, entrega ba justisa atu hatúr lia loos.

Entretantu, Liliana mós haktuir, nia rasik mos kumpri ona julgamentu iha Tribunál Rejiaun Oekusi ba-dala-rua tanba hetan akujasaun oioin katak nia abandona no tortura labarik sira iha orfonatu.

Ho akontesimentu sira ne’e, Liliana reforsa katak, iha konspirasaun husi ema sira ne’ebé laran moras ba nia ho Richar durante dezenvolve orfonatu Topu Honis.

“Sira barak husi liur no na’in-ida eis Topu Honis ne’ebé la satisfeitu ho ha’u nia pozisaun agora (Diretora Topu Honis),” Liliana haktuir no dehan, ba tinan ida ne’e sura nia servisu iha Topu Honis durante tinan 26 ona.

Kona-ba Richard Dascbach, moris iha loron 26 Janeiru 1937 iha Pennsylvanian, Estadus Unidu Amérika (EUA) lori misaun evanjelizasaun Katólika tama iha Oekusi iha tinan 1972.

Nia ordena sai padre iha tinan 1965, no liu tinan rua de’it, nia mai ona Nusa Tenggara Timur (NTT) no ikus liu tama ba Ambeno iha tinan 1972.

Invazaun Indonézia mai Timor-Leste, nia hela iha Oekusi to’o tinan 1999 no konsege subar joven lubuk ida hosi atakasaun pro-integrasionista.

Durante hala’o misaun evanjelizasaun, nia harii uma mahon ida ho naran Topu-Honis (Guide To Life) iha tinan 1993 ho objetivu atu fó mahon ba labarik kbi’it la’ek sira.

Tuir artigu ne’ebé fó sai iha Tatoli, rezultadu hosi orfonatu Topu Honis, konsege lori nia amigu sira hosi Amérika hodi halo adosaun ba Ambeno oan na’in-hitu (7) oras ne’e eskola ramata ona. Sira-nia ensinu superiór iha universidade balun iha Amérika, no balun iha Austrália, inklui mós balun oras ne’e iha deviza boot iha instituisaun F-FDTL no instituisaun Estadu seluk tan.

Richard akuzadu ho kazu pedofilia ka halo abuzu seksuál hasoru labarik minoridade.

Entretantu antes ne’e, Arsebispu Metropolitana Dili, Don Virgílio do Carmo da Silva, SDB, lihosi konferénsia imprensa iha Cámara Eclesiástica, Lecidere, Dili, subliña, entrega prosesu ne’e ba parte justisa hodi hatúr lia loos.

Kazu ne’e to’o mós iha Roma, Amu Papa foti ona desizaun hodi hasai Richard husi kargu nu’udar Padre. (cao)

 968 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Lezada La Kopera, Ministériu Públiku Presiza Av…” A few seconds ago

Lee Mós :
Inan Feto Ida Mate Hafoin Tenta Ultrapasa Mota

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No