Timor Post (12/03/2021)—Kazu husi moras daet COVID-19 mosu tan iha Dili ba ema na’in-11, ohin. Nune’e, total pasiente ne’ebé ekipa saúde sira asegura ona iha sala izolamentu Vera Kruz no Tasi Tolu sa’e ba 76.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Doutór Rui Maria de Araújo haktuir, kazu foun hirak ne’e identifikadu hafoin ekipa husi Sentru Integradu Jestaun Krize (SIJK), horiseik to’o ohin dader foti amostra husi ema hirak halo kontaktu ho pasiente pozitivu COVID-19 ne’ebé antese ne’e iha BTN2-Tasi Tolu no Bebonuk.
Husi kazu foun 11 ne’e, na’in-1 identifika iha Aldeia 4 Setembru kontaktu besik ho kazu iha grupu Ministériu Transporte no Komunikasaun; na’in-4 iha Aldeia Frekat-Postu Administrativu Don Aleixo kontaktu besik ho grupu Ministériu Finansas; na’in-4 profesional saúde iha HNGV kontaktu besik ho kazu antes iha fatin ne’e; na’in-2 husi Aldeia Mate Restu no Aldeia Zero Trez iha Fatuhada.
Entretantu, relasiona ho preparasaun SIJK nian iha luta kontra COVID-19, Doutór Rui rekoñese nia parte prepara ona kaixaun hodi antisipa haloot pasiente ne’ebé la konsege salva.
Maske nune’e, Doutór Rui rejeita total informasaun ne’ebé espalla katak pasiente sira iha sala izolamentu balun grave.
Iha loron hirak liu ba Doutór Rui dehan, pasiente sira hotu saudavel. (cao)
724 total views, 3 views today
Oinsa Ita nia Reaksaun iha Notisia Nee?
You have reacted on “Aumenta Tan Kazu Foun 11 iha Dili, Total Pasien…”
