ADVERTISEMENT

Xanana Observa Situasaun Loron Dahuluk Serka Sanitária iha Dili

Timor Post - Dili
  • Share
Foto: Jornalista José Caet

Timor Post (09/03/2021)—Líder Nasionál Kayrala Xanana Gusmão halo observasaun ba situasaun loron dahuluk serka sanitária iha Munisípiu Dili. Iha Fatuhada, hanesan baibain Xanana halo vizita ba kiok no komunidade sira ba hadau malu hasai foto hamutuk.

Observasaun Jornalista Timor Post haktuir Xanana uza kalsa badak no kamiza riskadu mutin, taka ho xapeo ne’ebé nia sempre hatas ba hamoos foer iha Dili laran.

Jornalista hakbeik ba líder karismátiku ne’e hodi so’e pergunta kona-ba situasaun atuál estadu emerjénsia no serka sanitária ne’ebé ko’alia mós kona-ba distansiamentu sosiál, Xanana ho resposta simples dehan, tanba ne’e labele besik ba nia.

“Ida ne’e mak labele besik ha’u,” Xanana fó resposta ida ne’e no kontinua atende komunidade sira ne’ebé hadau malu hasai foto ho nia.

Kuaze minutu-30 nia laran, Xanana sa’e hikas ba karreta husi dirasaun Fatuhada ba Komoro.

Entretantu observasaun Jornalista Timor iha sidade Dili ba loron dahuluk hafoin governu deside serka sanitária no konfinamentu obrigatóriu, iha sikun sira sidade nian ne’ebé estrada liga ba munisípiu sira hetan seguransa husi polísia munisipál.

Ba Jornalista sira Komandante Daruak Polísia Nasionál Timor-Leste (PNTL) Munisípiu Dili, Euclides Belo hatete, serka sanitária iha Munisípiu Dili transporte públiku sira bele halo movimentu.

“Transporte públiku iha Munisípiu Dili bele halo movimentu nafatin maibé distansiamentu sosial importante nafatin,” Euclides subliña ba Jornalista sira iha nia kna’ar fatin, Kaikoli Tersa (09/03/2021).

Situasaun Dili ein-jeral la’o hakmatek maibé movimentasaun ema ho transporte públiku maka menus uitoan.

Iha Hospitál Nacional Guido Valadares (HNGV) ema moras sira kontinua ba halo tratamentu saúde maibé kumpri regra saúde públiku.

Entretantu governu liuhusi reuniaun Konsellu Ministru foti ona desizaun hodi implementa medida serka sanitaria no konfinamentu obrigatóriu iha sidade Dili duran loron-hitu hahú husi loron Tersa (09/03/2021) to’o loron Segunda (15/03/2021).

Hafoin reuniaun Konsellu Ministru, Ministru Prezidénsia Konsellu Ministru (MPKL) Fidelis Leite Magalhães haktuir, desizaun ne’e governu foti tanba transmisaun lokal moras daet COVID-19 iha Dili laran.

Fidelis dehan, tanba tuir regra serka sanitaria durasaun ba loron hitu maka depois de prazu ida ne’e maka governu sei halo fali desizaun bazeia ba dezenvolvimentu situasaun atuál iha rai laran liuliu iha munisípiu Dili.

Durante serka sanitaria, Fidelis subliña, bandu ema halo viazen sai husi Dili ba munisípiu seluk exeptu ekipa sira ne’ebé transporta aimoruk, aihan no seguransa.

“Maibé só iha autorizasaun husi ministériu interior no husi Sentru Integradu Jestaun Krize (SIJK),” Fidelis hatete.

Nia hatutan, ba sira ne’ebé husi munisípiu seluk no rejidente iha Dili, sira bele tama mai Dili maibé tenke relata ba SIJK no kumpri konfinamentu obrigatóriu.

Konsellu Ministru mós deside atu labele halo atividade kulturais, reliziosa no atividade sira ne’ebé halibur ema barak durante periodu serka sanitaria iha Dili.

Fidelis dehan, konsellu ministru mós bandu atu komunidade sira sai husi um aba fatin públiku sira bainhira laiha nesesidade.

“A não ser nesesidade urjente sira hanesan ba hola aihan ou hola eletrisidade ou hola medikamentu sira, maibé la’o iha númeru kiik no bainhira pesoal seguransa sira halo para karik tenke justifika,” Fidelis salienta.

Atividade eskola no merkadu sira sei hatúr tuir despaixu husi parte relevante sira sei fó sai.

“Konklui katak atvidade hotu sei paradu durante loron hitu ne’e nia laran,” Fidelis subliña.

Jornalista José Caet / Jaime Pires

Editór Noémio Falcão

 531 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Xanana Observa Situasaun Loron Dahuluk Serka Sa…” A few seconds ago

Lee Mós :
Tribunál Deside Hasai Uma-Kain 12 iha Metiaut 

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No