ADVERTISEMENT

Ekipa Médiku Evakua Tan Estudante Ida ba Sala Izolamentu Vera Kruz, Konsellu Ministru seidauk Deside Serka Sanitaria iha Dili

Timor Post - Dili
  • Share

Timor Post (08/03/2021)—Ekipa médiku husi Sentru Integradu Jestaun Krize (SIJK) evakua tan ema na’in-ida ho inisiál EP ho idade 19 nu’udar estudante iha eskola sekundáriu ida iha Dili laran ne’ebé deskonfia hetan ona moras daet COVID-19 ba sala izolamentu Vera-Kruz.

Ekipa médiku akompaña husi parte seguransa evakua EP husi nia hela fatin iha Aldeia Meti-4, Suku Bebonuk.

Xefe Suku Bebonuk, Serafim Mashedo haktuir, EP hela hamutuk ho família ida iha Bebonuk ne’ebé nia karreta hetan kontratu ba raut foer iha sidade Dili. Nune’e, EP sempre tuir kondutor ho ekipa raut foer sira.

“Tuir informasaun husi karreta nain, nia (EP) la’ós hanesan traballador, nia ba hela ho karreta nain. Nia so tuir de’it sira (traballador), entaun pas iha teste nia mós deteta katak pozitivu,” Xefe Suku haktuir.

Entretantu Koordenadór Forsa-Tarefa ba Prevensaun no Mitigasaun Surtu COVID-19, Doutór Ruia Maria de Araújo antes ne’e hatete, nia parte halo relatóriu ba governu liuhusi konsellu ministru mak deside serka sanitaria iha DIli ka lae.

To’o notísia ne’e públika Timor Post kontinua akompaña reuniaun konsellu ministru ba halo desizaun ba situasaun atual iha Dili

Observasaun Timor Post haktuir ekipa médiku sira aleinde halo evakuasaun, kontinua halo servisu iha terrenu hodi liuliu halo identifikasaun ba família husi EP no buka tuir istória viajen ka movimentasaun husi EP karik hetan kontaktu direta no indireta husi pasiente na’in- rua husi Aldeia Terra Santa-Tasi Tolu.

Entretantu tuir observasaun ohin iha parte dader, movimentu ema no transporte públiku la’o normal, hahú husi rotunda estátua Prezidente Nicolau Lobato to’o Tasi Tolu  no iha Kampung Baru, husi rotunda ba área Bebonuk no kuaze iha Dili laran.

Relasiona ho situasaun ne’e, observasaun haktuir, eskola balun iha sidade Dili fó anúnsiu hapara provizória atividade eskola.

Observasaun Timor Post iha Eskola São Pedro, Komoro, odamatan boot eskola nian xave metin. Nune’e mós iha EBC 30 de Agusto, Komoro mós hanesan.

Autoridade eskola Kristal, Dili fó sai avizu urjente ba estudante no professor sira feriadu durante loron rua. Tuir planu atividade sei hahú fali iha Kuarta semana ne’e maibé depende ba desizaun governu se deside serka sanitária maka parte eskola sei submete hodi kontribui ba prevensaun moras da’et COVID-19 iha Timor Leste.

Desizaun hanesan mós husi Eskola Dili Institute Technology (DIT). “Ohin Segunda, 8 Marsu, DIT suspende temporária atividade hanorin iha kampus tanba Covid-19 iha Dili laran. Estudante sira hein iha uma too avizu tuir mai.” Anúnsiu ne’e fó sai iha pájina ofisiál Dosente Estanislau Saldanha.

Entretantu dadus jerál ne’ebé fó sai husi Sala Situasaun Sentru Integrasaun Jestaun Krize, haktuir, kazu konfirmadu foun: 3 (Na’in 1 husi Covalima relata horbairuak lorokaik, na’in-2 husi Díli relata horiseik no na’in-ida ohin). Nune’e sura hamutuk kazu atuál hamutuk 29.  (res/cao)

 567 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Ekipa Médiku Evakua Tan Estudante Ida ba Sala I…” A few seconds ago

Lee Mós :
MKAE Rekoñese Programa Distribuisaun Sesta Bázika Falla

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No