DILI— Xefe Estadu Maiór FALINTIL-Forsa Defeza Timor-Leste (F-FDTL), Major Jenerál Lere Anan Timur, kompriende ho desizaun sira governu nian ba interese estadu iha tempu saida de’it, maibé importante nesesidade ba forsa armada labele falta.
Lere afirma kestaun ne’e relasiona ho problema ne’ebé nia parte hasoru durante fulan rua ba tolu ona F-FDTL seidauk simu osan ransu ka osan ba sustenta nesesidade forsa sira nian lorloron.
“Ida ne’e ha’u bele dehan to’o agora, forsa laiha osan ransu durante fulan rua ona ba fulan tolu, liu-liu afeta ba forsa sira iha fronteira ne’ebá, ke sira moris la’ós ho osan ransu, entaun ami dezaraska hanesan uluk ke iha nee karik o nia kabun mamuk buka para han ida nee mak ami halo,” Lere haktuir ba Jornalista sira hafoin hasoru reuniaun ho Prezidente Repúblika Francisco Guterres Lú Olo, iha Palásiu Prezidensiál, Kuarta (10/02/2021).
Husu kona-ba, hanesan jenerál hato’o ona kestaun ne’e ba parte governu hodi responde, Lere hatán, “Relatóriu saida mak halo relatóriu, buat foun mak ita halo relatóriu mas ida be regular nee Ministru Defeza hatene, ita tenke han,” nia afirma.
Husu mós kona-ba, madida saida maka agora Jeneral halo hela hodi responde ba kestaun ne’e ho provizóriu, Lera hatán, “Jenerál halo hodi rezolve nesesidade nee mak deve mós diak, timor hotu-hotu hamlaha forsa mós hamlaha ona, Agora deve hela, fos mós deve, mina mós deve, tabaku mos deve, deve hotu,” nia informa.
Antes hakotu, Lere hatete, Governu bele foti desizaun saida de’it, ba interese estadu ne’e la problema, maibé importante forsa tenke han, forsa tenke iha roupa, forsa tenke iha transporte, operasionál e administrative forsa tenke iha kilat, forsa tenke iha infraestrutura.
Jornalista Venidora
Editór Noémio Falcão
1,370 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
Sorry, there was a YouTube error.