Timor Post (09/02/2021)- Embaixadór Austrália, Peter Roberts, hatete, governu Austrália iha kometimentu atu apoiu governu Timor-Leste, hodi halo vasinasaun virus corona, no mós harii postu haat ba Unidade Polísia Fronteira (UPF), iha fronteira.
Robert ba Jornalista sira iha Palasiu Governu, tersa (09/02), hafoin hasoru malu ho Primeiru Ministru Taur Matan Ruak esplika importánsia kooperasaun entre nasaun iha tempu agora mak oinsá hamate kutun corona.
“Ha’u ko’alia ho Primeiru Ministru kona-ba Austrália ho Timor-Leste nia kooperasaun iha tempu corona virus ne’e, partikularmente Austrália iha kometimentu atu suporta prosesu vasina iha Timor-Leste, no servisu hamutuk ho ministériu saúde iha area seluk inklui mós servisu ho parte PNTL atu asegura Fronteira. Ekipa Polísia sei fasilita postu Polísia (4) atu suporta servisu PNTL nia iha area fronteira”, dehan Robert.
“Ha’u mós informa ba Primeiru Ministru, Austrália prontu servisu hamutuk ho Timor-Leste hodi responde ba corona virus iha Timor-Leste”, hatutan diplomata.
Nia dehan Austrália mós prontu atu fornese vasinasaun ba populasaun sira hotu-hotu to’o porsentu 80, liu hosi prosesu distribuisaun medikasaun no monitorizasaun.
Jornalista : Jaime Pires
Editor : Mariano Martins
426 total views, 3 views today
Oinsa Ita nia Reaksaun iha Notisia Nee?
You have reacted on “Austrália Kometimentu Apoiu Vasinasaun no Harii…”
