Timor Post (20/01/2021)-Governu hahú hatama foos mutin (importasaun) iha programa Cesta Bázika (CB) tanba kuantidade foos menus iha rai laran.
Ministru Koordenadór Asuntu Ekonómiku (MKAE), Joaquim Amaral, iha Palasiu Governu, kuarta (20/01) rekoñese obrigadu Governu tenke hatama foos mutin atu programa ne’e kontinua to’o remata.
“Barak (populasaun) ne’e hein tanba buka foos lokál, entaun komesa iha ona difikuldade atu halibur, entaun tenke para loron ida ka rua hodi hetan fali” haktuir Ministru.
Nia tenik Foos mutin sira ne’ebé mak tama iha programa (CB), tanba agora komesa tama iha faze ida ne’ebé mak foos rai hosi tempu ba tempu nia kuantidade komesa menus.
Entretantu distribuisaun sesta bázika agora foin porsentu 40, nia dehan fulan ne’e remata bele to’o 60%.
Governante adianta Ministériu halo ona despaxu hodi bele autoriza foos importasaun sira hodi bele aselera distribuisaun sesta bázika, nune’e mós hamenus folin foos rai ne’ebé mós sa’e.
Ministru subliña agora tenke hare potensialidade ne’ebé mak iha, la’ós atu importa maibé iha foti hodi bele kompleta programa ne’e.
Tuir planu Governu nian programa ne’e sei finaliza iha fulan Marsu tinan 2021. Maibé enfrenta udan no stok menus, halo MInsitru dehan ritmu distribuisaun neineik oituan, maibé esforsu an hodi kumpre kalendáriu ne’ebé mak iha.(Jornalista: Jaime Pire, Editor: Mariano Martins)
762 total views, 3 views today
