Timor Post (13/01/2021)—Governu liu-husi reuniaun Konsellu Ministru fó kompeténsia ba Ministra Negósiu Estranjeiru no Kooperasaun (MNEK), adia graduasaun Timor-Leste ba Organizasaun Nasoins Unidas (ONU), maski rekomenda ona hosi organizasaun país menus dezenvolvimentu (Least Development Country-LDC).
Adalgisa Magno hafoin reuniaun Konsellu Ministru iha Palasiu Governu, kuarta (13/01), “LDC sira rekomenda atu ita gradua ona, maibé ohin desizaun iha Konsellu Ministru ita adia lai, para bele haree fila-fali antes ita gradua, portantu ita sei hakarak hetan lai tulun husi komunidade internasionál antes de ita ba halo graduasaun”, Magno informa ba Jornalista.
Governante hatutan, kuandu gradua sedu iha país menus dezenvolvimentu, Timor-Leste halo imprestimu iha rai li’ur funan boot impaktu ba ekonomia iha parte emprestimu nian, mais la gradua funan ki’ik.
Membru Órgaun Ezekutivu fó ezemplu, kuandu Timor-Leste gradua esporta sasán ba nasaun dezenvolvidu sira taxa sei boot, depois ONU ninia ajuda barak ba Timor mós sei hamenus.
“Kuandu ita sidauk gradua taxa menus, ne’e hanesan benefísiu sira ne’ebé mak ita bele hetan. Timor-Leste mós bele asesu nafatin ba fundus mudansa klimátiku ne’ebé boot teb-tebes”, konklui Ministra.(Jornalista: Jaime Pires, Editor: Mariano Martins)
678 total views, 3 views today
Bele hare Video Seluk :
Subscribe to Timorpost
