Timor Post (11/01/2021)- Vise-Primeiru Ministru no Ministru Planu Ordenamentu, José Reis hatete, servisu konstrusaun ba Aeroportu Nicolau Lobato Komoro hahú la’o daudauk.
Governante hatutan, Ministériu obras Publikas agora servisu hamutuk hela ho Teras Propriedade atu oinsá hasai komunidade sira iha area ne’ebá.
“Prosesu konstrusaun Aeroportu Komoro prosesu la’o daudauk ona ho ekipa ba reasentamentu oinsá mak bele hasai ema husi ne’ebá”, informa Ministru iha Palasiu Governu, segunda (11/01).
Reis adianta Ministériu Finansas halo hela enkontru ho finansiadór sira bele garante duni orsamentu ba re kualifikasaun Aeroportu Nikolau Lobato nian.
Entretantu konstrusaun ba projetu ne’e sei finansia hosi estadu no povu Japaun ho montante orsamentu millaun U$44.
Parte seluk Vise PM informa mós kona bá servisu komisaun tékniku ba Kabu Sub Marinu nian, lakleur tan sei nomeia koordenadór ida atu bele asegura projetu ne’e.
“Ita hatene katak orsamentu Millaun 44 atu sosa ekipamentu informátika, konkursu ba sosa material informátika ne’e. Ida ne’e komisaun nasionál aprovizionamentu “CNA” sei halo hela preparasaun ba kestaun ida ne’e sei liu husi prosesu tenderizasaun iha tempu badak nia laran.
Jornalista: Jaime Pires
Editor: Mariano Martins
744 total views, 3 views today
Bele hare Video Seluk :