Timor Post (08/01/2021)— Vise Prezidente Parlamentu Nasionál, Maria Angelina Sarmento, hateten família reklamasaun sira iha direitu duni atu simu subsídiu agregadu familiar $ 200, maibé Governu tenke kria regras hodi kumprimenta Estadu Emerjénsia (EE), tanba iha prosesu ida nee halibur ema barak.
“Agora mekanizmu atu halo distribuisaun mak hau hanoin governu konsiente tebetebes ho dekretu lei sobre ezekusaun Estadu Emerjénsia ne’ebé mak sira mak aprova iha konsellu Ministru. Ha’u fiar katak sira iha mekanizmu própriu atu hakaruk nafatin ba regras no prosedimentu ne’ebé governu rasik aprova iha konsellu ministru”, Angelina hatete iha Parlamentu Nasionál, kuarta (06/01).
Angelina husu governu aplika regra rigorozu kona-ba distansiamentu sosiál no fíziku, inklui bee moos no sabaun, para reklamante sira fase liman no obrigatoriu uza máskara.
Iha fatin hanesan, hatutan hosi Vise-Prezidente Bankada FRETILIN, Antonino Bianco, atu governu implementa mekanizmu própriu atu nune’e nafatin kumpre regulamentu EE nian.
“Kuandu mai simu tenke fase liman, distansiamentu social no uza máskara”, hatutan Bianco.
Entretantu reklamante hamutuk 12.597 iha territóriu maka Ministériu Solidariedade Sosiál no Inkluzaun hamutuk ho Ministériu Administrasaun Estatál (MAE) anunsia atu simu subsídiu 2000 iha loron sesta (08/01).
Jornalista : Julio Salinas Soares
Editór: Mariano Martins
497 total views, 3 views today
Bele hare Video Seluk :
Subscribe to Timorpost
