ADVERTISEMENT

Xanana Apoiu Mikrolete ida Ba Uma Mahon Sentru Miguel Magone

Timor Post - Dili
  • Share

Timor Post (05/01/2020)-Lider Nasionál Kayrala Xanana Gusmão liu hosi Fundasaun Xanana Gusmão, Tersa (05/01) fó apoiu transporte karreta mikrolete ida ba Uma Mahon Centru Miguel Magone  iha Balidi-Dili.

Maski la hola parte iha Executivu no mós órgaun importante ruma iha estadu, maibé eis PM ne’e kontinua assume responsabilidade morál nu’udar lider nasionál hodi la tuur nonook bainhira rona lian halerik husi ninia sidadaun sira.

Foin lalais ne’e, bainhira partisipa natál hamutuk ho seminarista sira iha Semináriu Minor Balide Dili, teki-teki labarik lubun ne’ebé hamahan aan iha Centro Miguel Magone ne’ebé hetan informasaun kona-ba prezensa Xanana nian la husik leet, nune’e hakbesik kedas hodi aprezenta problema ne’ebé sira enfrenta.

Ba Xanana Gusmão, ho sentimentu triste kahur kontente, hodi rona vítima bazeia ba jéneru hirak ne’e relata, katak aleinde enfrenta problema psikolojia no mós domin husi família, sira mós enfrenta problema ligadu ho kondisaun hela fatin inklui seluk tan.

Rona preokupasaun ne’e, Xanana Gusmão foti kedas asaun liu husi apoiu nesesidade hirak ne’ebé uma mahon refere enfrenta, aleinde ai han, toba fatin no seluk tan, liu husi nia fundasaun Xanana Gusmão apoiu mós transporte (Mikrolete ida) ne’ebé hakerek naran, Sentru Miguel Magone (Fundasaun Xanana Gusmão) hodi fasilita dezlokasaun labarik sira nian.

“Ha’u agradese tebes ba funsionáriu sira husi uma mahon Sentru Magone tanba sira ba dada ha’u iha semináriu minor iha loron, 27 Dezembru 2020, atu mai haree rasik ho matan kondisaun labarik  sira iha ne’e. Ha’u apresia no elojiu tebes dedikasaun sira hotu iha ne’e hodi tau matan ba labarik sira ne’ebé presiza tebes tulun no atensaun, “haktuir Xanana iha mensajen doasaun karreta ne’ebé tranzmite liu husi Presidente Executivo Centro.

Eis Xefe Executivu iha esperansa katak, ho doasaun transporte husi fundasaun Xanana Gusmão sei tulun dezlokasaun labarik sira nian ba eskola no mós fatin seluk.

“Ha’u iha esperansa katak, transporte ida ne’e sei tulun dezlokasaun labarik sira nian aleinde ba eskola no mós fatin seluk,” nia espera

Lider nasionál ne’e dezafia funsionáriu iha Uma Mahon Centro Magone atu nafatin dedika aan hodi próteze direitu labarik ne’ebé konsagra ona tuir lei Direitu Labarik nian.

“Ha’u husu ba imi hotu iha uma mahon ne’e atu dedika aan nafatin hodi próteze labarik sira tuir direitu fundamentál ne’ebé imi defende. Ha’u husu ba Maromak fó tinan foun 2021, ne’ebé kmanek tebes ba ita hotu,” tenik Xanana ho esperansa.

Iha fatin hanesan, Diretór Sentru Magone, Damião da Silva konsidera, apoiu refere importante tebes tanba ne’e sei asegura ho responsabilidade nune’e bele fasilita labarik sira.

“Apoiu ne’ebé fó husi Maun Boot Xanana Gusmão liu-liu doasaun transporte mikrolete ida ne’e importante tebes atu tulun dezlokasaun labarik sira nian. Tanba ne’e, promete sei utiliza ho responsabilidade hodi fasilita labarik sira, “deklara responsavel Centro

Fundasaun ne’e rasik eziste iha tinan 1997, no hahú funsiona iha tinan 2000 ate agora. Daudaun ne’e akomoda  labarik hamutuk 79 kompostu husi mane 12, feto 67, mai husi munisípiu sanulu resin rua inklui RAEOA.

Aleinde fó protesaun ba labarik, fundasaun ne’e mós halo konsiliasaun ba labarik sira ne’ebé sai vítima ba kazu violénsia ba jéneru liu husi rekuperasaun ba mentalidade inklui fasilita formasaun formál no la  formál ba hirak ne’ebé hamahan aan iha Fundasaun ne’e rasik.

Jornalista: Jaime Pires

Editor: Mariano Martins

 665 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Xanana Apoiu Mikrolete ida Ba Uma Mahon Sentru …” A few seconds ago

Lee Mós :
Terras Propriedade Fó Formasaun ba Xefe Suku

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No