DILI—Eis Prezidente Republika José Manuél Ramos Horta halo observasaun ba partidu polítiku sira iha Timor Leste, nia preokupa liuliu ho CNRT bainhira partidu ne’e nia prezidente Kayrala Xanana Gusmão laiha.
“Ha’u preokupadu,” Horta hatete kestaun ne’e bainhira nia sai oradór iha konferénsia nasional Timor Leste Press Union (TLPU), ho tema Papél TLPU iha prosesu dezenvolvimentu”, iha loron Sesta (20/12/2019), iha Otél Golgota, Dili.
Horta dehan, FRETILIN ‘mate bandeira hun’, PD augenta tinan barak ona.
Premiadu Nobel ba Paz ne’e liga kestaun ne’e relasiona ho durante nia ko’alia iha konferénsia ne’e foku liu ba kestaun lideransa.
“O bele ba estuda iha Harvard, ha’u mós ba estuda iha ne’ebá, maibé Xanana nia koñesimentu boot liu Psd. sira, ita bele estuda, maibé tenke haree ba realidade iha Timor,” Horta subliña.
Durante okajiaun, Horta sempre lori Xanana sai ezemplu ba lideransa ne’ebé di’ak liu. Lori prosesu liu dezafiu oioin no konsege atinji duni objetivu ne’ebé sempre povu tomak nia hakarak.
“Xanana fó ezemplu di’ak tebes, Xanana dala barak rona mak barak liu, ha’u koñese di’ak Xanana, nia hanesan estudante, nia rai, nia estuda, nia rona hotu-hotu, pasiensia teb-tebes. Dokumentu bele barak maibé nia estuda tó hotu maka foti desizaun, lider tenke nune’e duni,” Horta hatete.
Horta liga mós kestaun lideransa ne’ebé nia observa, iha suku balun laiha problema no organizadu tebes tanba lideransa lokál ne’e iha duni kapasidade.
Lideransa komunitáriu laiha kredibilidade, la matenek no kreatividade. Suku ne’e sei la’o de’it iha fatin no sempre mosu problema,” nia hatutan.
“Lideransa la’ós tenke hasai kursu boot, maibé importante maka tenke iha koñesimentu, presiza kursu, forma ekipa ne’ebé di’ak,” Horta salient. (cao)
1,035 total views, 3 views today
Bele hare Video Seluk :
Subscribe to Timorpost
