Timor Post (28/12/2020)—Ministériu Saúde liuhusi Sentru Integradu Jestaun Krize (SIJK) informa, teste ba amostra husi joven ne’ebé iha loron 24/12/2020 kalan halai sai husi kuarentena ba nia uma iha Taibessi, negativu.
“Ema ne’ebé hala’i husi kuarentena ba uma hamutuk ho família sira, ita kaptura ba tau hamutuk ho família iha otel, i ema sira ne’e halo ona teste rejultadu negativu hotu,” Odete haktuir ba Jornalista sira iha Salaun Sentru Integradu Jestaun Krize (SIJK), CCD, 28/12/2020.
Entretantu Odete informa, alin feto ne’ebe akompana nia ama nia isin mate husi Malazia liu husi Indonezia to’o Aeroportu Komoro iha loron 25/12/2020 hodi ba liu uma, sei hein hela rejultadu teste husi laboratorium.
Odete dehan, servisu ba kazu ne’e todan maibé ekipa front line sira konsege duni i presiza hetan rekoñesimentu.
“Front line sira nia servisu ita ladun valoriza, maibé to’o iha momentu krítikus, ministériu saúde hamutuk ho font line husi ministériu hotu-hotu maka hala’o servisu todan ne’e. Loloos ita presiza valoriza mak servisu sira ne’e uluk,” Odete subliña.
Entretantu pasiente ba moras daet COVID-19 atualmente hamutuk na’in-13.
Pasiente na’in-13 ne’e inklui timoroan na’in 11 no estranjeiru na’in rua-ida iha Dili no ida iha Oekusi.
Odete haktuir, pasiente na’in-13 ne’e deteta bainhira sira asegura hotu ona iha kuarentena. “Laiha ida maka deteta iha auto-kuarentena,” nia hatutan.
Odete mós husu ba públiku atu lalika fi’ar romoris sira, rona de’it informasaun hotu ne’ebé fó sai ofisial husi Ministériu Saúde liuhusi sentru integradu jestaun krize.
Odete dehan, sentru integradu jestaun krize to’o agora sei eziste hela iha CCD tuir orientasaun Primeiru Ministru Taur Matan Ruak.
“Informasaun sira kuandu seidauk ofisializa husi Ministériu Saúde ou la’ós Ministériu Saúde mak publika signifika informasoens sira ne’e laloos. Tanba na’in ba servisu ne’e rasik mak Ministériu Saúde,” Odete afirma.
Odete klarifika, Total númeru Teste hamutuk 16324, hein resultadu hamutuk 397, total komulativu kazu 44. Husi total ne’e, atualmente pasiente na’in-13 mak iha hela sala izolamentu iha Dili no Oekusi.
Total karantina hamutuk 349 (Dili :279, Municipio: 70), auto karantina hamutuk 136 (Dili: 129 Municipio: 7), pasa karantina 14 dias hamutuk 6813 (Dili: 5641, Municipio: 1172). (res/cao)
881 total views, 3 views today
Oinsa Ita nia Reaksaun iha Notisia Nee?
You have reacted on “COVID-19: Teste ba Joven Halai husi Kuarentena …”
