Nasaun Hamutuk-13 Lakohi Uza AtraZeneca Tanba iha ona Ema Mate Hafoin Vasinasaun 

husi -156 views

Timor Post (18/03/2021)—Nasaun hamutuk-13 inklui Indonézia deside adia vasinasaun AtraZeneca tanba mosu ona kazu ema mate hafoin uza aimoruk prevensaun ba moras daet COVID-19 ne’e.

Indonézia liuhusi Ministériu Saúde foti ona desizaun ba adiamentu ne’e iha loron Segunda (15/3/2021).

Relatóriu husi Ajénsia Medikamentu Uniaun Europeia haktuir, iha ona kazu hamutuk 30 tromboembolizmu ka konjelamentu ran husi vasinasaun ba ema hamutuk milaun 5 iha Europa.

Iha nasaun Áustria, notísia fó sai iha mídia lokal rai ne’eba nia haktuir, médiku ida ho idade 49 mate tanba sirkulasaun ran intupidu tiha hafoin hetan vasina ho aimoruk AstraZeneca.

Nasaun sira rejeita vasina AtraZeneka ne’e maioria husi nasaun sira iha Europa inklui Áustria, Itália, Dinamarka, Islándia, Norwegia, España, Bulgária, Estonia, Latvia, Lituania no Luksemburg.

Ba dahuluk liu nasaun sira iha Ázia maka Tailándia no tuir fali Indonézia.

Maske nune’e, ba Timor Leste, maske governu liuhusi konsellu ministru seidauk halo desizaun hodi uza vasina ida ne’ebé mak di’ak liu, maibé Primeiru Ministru Taur Matan Ruak dehan, bainhira Organizasaun Mundiál Saúde (OMS) seidauk hatete vasina ne’e ladi’ak maka governu sei avansa ho AtraZeneca.

“Inkuantu organizasaun mundiál saúde seidauk hatete vasina ne’e ladi’ak, ne’e ita sei nafatin avansa ba AtraZeneka,” Taur Matan Ruak subliña ba Jornalista sira hafoin informa situasaun atuál rai laran no esforsu governu nian durante ne’e ba Prezidente Repúblika Francisco Guterres Lú Olo, Kuarta (17/03/2021).

Taur la ko’alia kona-ba governu maka sei ho osan rasik sosa vasina ka hetan de’it apoiu husi organizasaun mundiál balun.

Maske nune’e, Taur dehan, bainhira vasina seidauk to’o iha Timor, tanba COVID-19 fokus ba ema nia komportamentu maka nia dehan, sidadaun hotu hatudu komportamentu hodi kumpri regra sira atu maka moras ne’e sei la daet to’o hamate ema iha rai laran.

“Ita la halo milagre. Vasina seidauk iha, komportamentu. taka ibun, fase liman, labele halibur malu, kuandu moras ona informa lalais. Ne’e de’it. Liu ida ne’e laiha,” Taur salienta.

Entretantu notísia fó sai iha Ajénsia Lusa, reprejentante OMS iha Timor Leste Arvind Mathur haktuir, nia parte seidauk hetan rajaun forte katak vasina AtraZeneca fó perigu ba ema nia vida.

Tanba ne’e, nia dehan, ba Timor Leste importante liu maka tenke iha kampaña maka’as liu kona-ba vasinasaun.

Komunikadu ba imprensa fó sai husi WHO fó komentáriu katak, iha nasaun balun iha Uniaun Europa temporariamente suspede uza vasina AstaZenaka, tanba bazea ba informasaun dehan vasina ne’e halo ran intupidu ba sira ne’ebé simu vasina ne’e, maibé iha nasaun balu mos dehan seguru liu uza vasina ne’e. (cao)