Naimori Rejeita Hamutuk ho FRETILIN-PLP, KHUNTO Preokupa ho Atake Pesti Corona  

husi -7 views

DILI—Konsilleru Máximu Partidu Kmanek Haburas Unidade Nasionál Timor Oan (KHUNTO) rejeita informasaun ne’ebé esplalla katak hamutuk ho FRETILIN ho PLP forma koligasaun hodi forma governu foun.

“Ha’u la hatene buat ida,” Naimori via telefone ba Timor Post, Tersa (14/04/2020) bainhira konfirma kona-ba informasaun ne’ebé la’o iha públiku katak KHUNTO, FRETILIN ho PLP iha ona konkordásia verbal ne’ebé sei asina hamutuk hodi forma governu dasia.

KHUNTO nu’udar partidu foun ne’ebé foin hetan kadeira lima iha eleisaun jerál 2017 no mantein iha eleisaun antesipada 2018.

KHUNTO hamutuk ho CNRT ho PLP mak forma governu daualu lideradu Primeiru Ministru Taur Matan Ruak. Maibé hafoin orsamentu jerál estadu 2020 nian xumba iha Parlamentu Nasionál no prezidente repúblika orienta movimentasaun polítika hodi forma governu dasia, KHUNTO hamutuk ho CNRT, PD, UDT, FM ho PUDD asina ona koligasaun foun no indizita ona Primeiru Ministru Kayrala Xanana Gusmão no entrega ona ba Prezidente Repúblika Francisco Guterres Lú Olo iha fulan hirak liu ba, maibé to’o agora seidauk iha desizaun husi Xefe Estadu.

Entretantu Deputadu KHUNTO atuál Vise Prezidente Parlamentu Nasionál Luis Roberto afirma, KHUNTO fó apoiu nafatin ba governu daualu tanba situasaun atake pesti corona alias COVID-19.

“Ita haree ba situasaun agora ita tenke apoiu duni (Primeiru Ministru Taur Matan Ruak), apoiu  duni para prevene moras ne’e, maibé se moras laiha ita ko’alia buat seluk,” Luis afirma fó sai iha mídia TT, Tersa (14/04/2020). (yto/cao)