Naimori Hasoru ona Xanana Deskuti Governu Foun, “Maun Na’in Rua Ne’e Di’ak Hotu”

husi -19 views

DILI—Konsilleru Máximu KHUNTO José Naimori Bukar informa, nia rasik hasoru ona Prezidente CNRT, Kayrala Xanana Gusmão, iha loron Kinta (20/02/2020), hodi ko’alia kona-ba formasaun governu foun ida hodi nune’e bele aselera lori hikas orsamentu jerál estadu ba parlamentu nasionál, no lori ba prezidente repúblika promulga ba hadi’a povu no nasaun nia moris.

“Ha’u ba hasoru ona Maun Xanana, atu prepara oinsá iha planu ida ne’ebé CNRT, PD ho KHUNTO ho partidu seluk atu forma governu foun no prepara orsamentu atu lori ba parlamentu no lori ba prezidente,” Naimori informa ba públiku iha entrevista sala redasaun RTTL. EP, Kinta kalan (20/02/2020).

Naimori haktuir, antes nia hasoru Xanana, Sekretáriu Jerál CNRT, Francisco Kalbuadi Lay ho Kuadro Polítiku Jacinto Rigoberto ba hasoru uluk ona nia hodi ko’alia kona-ba asuntu formasaun governu foun.

“KHUNTO prontu de’it atu asegura. Hanesan maun Xanana, nia nu’udar lideransa ne’ebé úniku iha Timor Leste hanesan mos maun sira seluk,” Naimori afirma.

Hatan ba moderador entrevista kona-ba oinsá KHUNTU tetu no deside entre líder boot rua, Taur Matan Ruak iha PLP ho Xanana Gusmão iha CNRT ne’ebé hamutuk ho KHUNTO forma governu daualu, Naimori hatete, líder másimu nain rua ne’e di’ak hotu, maibé tenke hili dalan ida ne’ebé bele hakotu impase polítika atuál.

“Maun nain rua ne’e di’ak hotu, maibé ita presiza orsamentu ida ba ita nia povu,” Naimori salienta.

Ko’alia kona-ba interse povu nian, Naimori hatete, partidu polítiku tenke iha prinsípiu ida atu nakloke ba forsa polítika hotu ne’ebé mak iha liu posibilidade ba hetan governu foun ida hodi hakotu inserteja polítika no konsentra ba hadi’a povu no nasaun nia moris di’ak.

Kona-ba deklarasaun deputadu KHUNTO nian arepende ho CNRT nia pozisaun bainhira la fó apoiu ba orsamentu jerál estadu 2020 nian, Naimori dehan, ne’e hanesan falta de koordenasaun ida iha ne’ebé CNRT rasik mós hakarak solusiona impase polítika ho dalan ne’ebé agora la’o daudauk.  (cao)