Viqueque, 19 jullu 2022– Hafoin rekolla informasaun hosi familia vitima inklui sasin sira relasiona ho kazu asaltu no tentativa homesidiu ba suspeitu ho karakteristika pessoal, isin lotuk, ladun as, hatais faru kor metan ekipa konjunta SIP (Servisu Informasaun Polisia), Munisipiu Viqueque, lansa vijilânsia hodi buka tuir suspeitu no identifika ona autor krime ne’e.
Nune’e komunika kedas mai Forsa Rezerva no Eskuadra PNTL Uatulari, hodi halo kapturasaun ba joven mane ida ho inisial AS, tinan 34, husi Aldeia Tatilari, Suku Matahoi, Postu Administrativu Uatulari, Munisipiu Viqueque, ne’ebe komete kazu asaltu no tentativa homesidiu hakanek vitima FPG ne’ebe akontese iha area Uaida’e, Suku Uaitame, Postu Administrativu Uatulari, Munisipiu Viqueque.
Tuir kronolojia ne’ebe PNTL rekolla, vitima FPG, tinan 30, husi Aldeia Daralari, Suku Afaloicai, Postu Administrativu Uatucarbau, Munisipiu Viqueque, hetan tá iha loron segunda tuku 00h56 madrugada wainhira sae tuir kareta Angguna ida husi diresaun Uatucarbau mai Viqueque nian.
Wainhira iha viajen ema nain 3 falun oin metin hamrik iha dalan, no vitima FPG husu sira atu ba ne’ebe, suspeitu hakbesik mai iha kareta no hateke tama iha kareta laran la sa’e kareta.
Nune’e wainhira kareta aranka suspeitu AS hasai sasan kroat lansa tá husi kotuk hodi rezulta vitima nia liman sorin parte liman los kanek grave no suspeitu halai tama tiha iha nu laran.
Vitima no pasajeirus sira iha kareta laran la kuñese suspeitu tanba iha kalan no sira falun oin metin. Kondutor halai lalais kedas ba Eskuadra PNTL hodi transporta kedas vitima ba halo kurativu iha sentru saude Uatulari, hodi hetan tratamentu saude no vitima husu atu PNTL investiga klean kazu ta kanek nia.
Entretantu, suspeitu nia kaben deklara, iha kalan nia kaben suspeitu AS toba la dukur no aranja razaun katak nia laen AS hapara kareta atu sa’e hamutuk tanba kareta la para nune AS lansa kedas tá ba vitima FPG.
Agora daudaun ekipa konjunta entrega ona suspeitu AS ba Esquadra PNTL Uatolari hodi kontinua halo identifikasaun no investigasaun ligadu ho kazu tentativa homisídiu ne’e. (AX/SRP)
2,193 total views, 3 views today
Bele hare Video Seluk :
Subscribe to Timorpost
