DILI (Timor Post)—Tanba de’it komunidade sira hela dook no susar asesu ba saúde, tanba ne’e Diretór Servisu Saúde Munisípiu Vikeke husu ba Ministériu Saúde atu aumenta tan postu saúde.
Diretór Servisu Saúde Munisípiu Vikeke (SSMV), Francisco de Carvalho, hatete munisípiu Vikeke durante ne’e hasoru problema boot, tanba liga ho geografikamente area ne’ebé luan inklui kondisaun iklima, nune’e difikulta movimentu pesoál saúde sira nian atu to’o iha komunidade sira nia uma, nune’e komunidade sira mós defisil atu asesu ba iha fasilidade saúde.
“Esforsu ne’ebé MS liuhosi servisu saúde munisípiu ho esforsu atu harii postu saúde iha area remotas, maibé ho ita nia esforsu ne’ebé iha ita seidauk sufisiente, tanba dauduak ne’e komunidade barak mak seidauk asesu ba iha saúde”, Francisco ba jornalista sira iha Salaun Delta Nova, Kuarta (29/09).
Nia konta, munisípiu Vikeke iha suku 36, iha postu saúde hamutuk 43 no sentru saúde 5, maternidade 4 inklui internamentu ida.
“Maibé ita ko’alia intermus demografia ita nia komunidade barak mak muda hela fatin ba iha area ne’ebé dook hosi fasilidade saúde, maibé ita nia preokupasaun mak ne’e, ita lori fasiidade to’o iha sira nia fatin no sira kontinua muda hela fatin ba dook, situasaun ida ne’e mós sai defikuldade ba profisionais saúde sira atu fó atendimentu”, nia subliña.
Nia afirma, tuir polítika MS nian, katak kada suku ida hetan postu saúde ida, maibé Munisísipiu Vikeke iha ona postu saúde 43, iha ne’ebá suku ida dala ruma iha ona postu rua bele mós iha tolu, tanba suku hirak ne’e ho populasaun ne’ebé barak.
“Populasaun sira nia hela fatin la’os iha fatin ida de’it maibé hela ho distansia ne’ebé dook, balun hela iha mota kuak no balun hela iha foho lolon. Tanba ne’e suku ida estabelese ona postu rua ou tolu iha ne’ebá, ha’u fó ezemplu hanesan Kraras, suku Buileo iha postu saúde rua, tanba populasaun hela ho fatin ne’ebé lahanesan”, nia esklarese.
Nia informa, provizoriamente pesoál saúde iha Vikeke sufisiente, maibé presiza atu kompleta de’it fasilidade saúde.
Total médiku iha munisípiu Vikeke kompostu hosi médiku 55, enfermeiru 90 resin, no parteira 46, maibé Servisu Saúde munisípiu Vikeke presiza aumenta infraestrutura. (res)
755 total views, 3 views today
