Bobonaru (Timor Post)- Institutu Defeza Nasionál (IDN) kontinua konstrui no kanaliza Bee Moos ba faze dala tolu, ba Komunidade uma kain 359 ho total populasaun 2635, hosi Aldeia Tunu Eru no IlatLaun Marobo, Postu Administrativu Bobonaru, Munisípiu Bobonaru.
Programa IDN ne’ebé ho lema “Béba liberdade ne’e” hahú konstrusaun no kanalizasaun hosi Komunidade Aldeia rua iha Suku Ilatlaun no akompaña tékniku hosi IDN, hahú hosi loron 9 Fulan Maiu no finaliza iha loron 25 Juñu 2022.
Konstrusaun projetu sosiál ne’e halo tanba pedidu ne’ebe hato’o hosi Komunidade Aldeia Tunu –Eru, Suku IlatLaun reprejenta hosi Lourenso Barreto no hetan aprovasaun Diretór IDN Comodoro “Cmd” Professor Doutor Donaciano Costa Gomes “Pedro Klamar Fuik”.
Sistema instalasaun hosi projetu sosial ne’e, utiliza makina bomba Bee unidade tolu, hodi transfere Bee hosi tanke halibur Bee matan, ba tanke distribuisaun iha foho leten ho distánsia metru 620.
Fornese mós tornera geral unidade 4 hakbesik comunidade sira hodi asesu. Inklui halo instalasun linha Eletricidade hosi postu final linha jerál nian to’o terenu kuaze 1. 4 KM ba trabalha makina sira hodi fornese Bee Moos ho total orsamentu rihun 9 resin hosi IDN.
Projetu sosial ne’e ho objetivu atu lori futuru líder hosi Policial no Militar sira ne’ebé atual ne’e tuir hela formasaun iha IDN hodi hakbesik an liu ba povu, liu-liu povu iha área rurais.
Diretór Institutu Defeza Nasionál (IDN) Comodoro “Cmd” Professor Doutor Donaciano Costa Gomes “Pedro Klamar Fuik, hatete Bee mos importante ba ita ema, tanba objetivu hosi ita nia ukun ann maka, povu tenke moris diak no hakmatek. Nune’e Estadu iha responsabilidade ida, atu halo dezenvolvimentu infrasturtura báziku hanesan Estrada, Bee moos, no eletricidade ,kria kampu servisu para povu bele hetan objetivu ne’ebe maka ukun an ne’e, fo liberdade ho moris diak.
Atual Chefe Estadu Maior Forsa Armadas Pedro Klamar Fuik, hatutan, Programa Bee Moos ohin IDN ho autoridade Munisipal sira inagura, importante tebes ba comunidade Suku Ilatlaun sira ne’ebe hela iha área rurais, tanba fatin ne’ebe sira hela iha ba as, no susar tebes sira asesu Bee Moos.
Tuir Comodoro Pedro Klamar Fuik, Bee Moos importante ba populasaun sira, nune’e aban bairua, sira ba iha instituisaun sira haknar na ba, sira tenke iha kapasidade no kbiit, atu bele responde nesesidade saída de’it.
“Ohin ita inaugura bé mos ba suku IlatLaun, programa ida ne’ebé ami hala’o ona iha fatin seluk hanesan Suku Fada Bloko, Munsipiu Aileu no Aldeia Darlau, suku Bekora Munisipiu Dili. Hanesan programa pilotu ne’ebe edukativu ba IDN nia alunos Cursu Estadu Maior Konjunta Integradu (CEMCI) sira josi Polisia no Militar tanba alunu sira maka futuru líder iha institusaun PNT ho F-FDTL inklui lider ba fungsaun publiku sira. Sira bele ba hare populasaun sira nia realidade,koiñese no bele introduz ba sira, hanoin ida imposibel bele ba posevel , utiza arte iha kontestu ida ne’e, aplika teknolojia no ba futuru IDN sei kontinua hala’o manutensaun,” afirma eis Komandante Komponente Naval ne’e.
Rejentante Prezidente Autoridade Munisipál Bobonaru, João Fatima do Carmo, hatutan, hanesan autoridade lokál hato’o agradese ba Instituisaun Defeza Nasional (IDN) tanba kontribuisaun hosi finaliza ona kontrusaun no kanalizaun Bee Moos ba comunidade Aldeia rua.
“Reprejenta autoridade Municipal lori presidente autoridade nia naran hato’o de’it agradese wa’in ba tulun no apoiu hosi IDN ,liu-liu ba ekipa tekniku sira ne’ebe durante ne’e hala’o servisu ho ami nia komunidade sira iha area parte Aldeia rua , suku ida ne’e asesu ba sira nia nesesidade, hanesan autoridade mos, kontinua husu ba lideransa komunitariu sira atu nafatin tau matan ba ita nia fasilidade sira kanaliza Bee iha área ne’e,”agredese reprejentante autoridade ne’e.
Xefe suku IlatLaun, juvinal Pires Amaral, hatutan, Bee Moos ne’ebé konstrui no instala hosi IDN mai iha Suku IlatLaun, lori benefísiu ba comunidade Aldeia rua, uma kain 359 ho total populasaun 2635 hosi Aldeia Tunu Eru no IlatLaun Marobo, Postu Administrativu Bobonaro, Munisipiu Bobonaro hodi hetan asesu.
Tuir reprejentante komunidade Suku IlatLaun ne’e, dezde ukun aan mai to’o agora komunidade suku ne’e infrenta hela ba bee moos tanba sira hela iha rai leten, bee matan iha kraik, maibé orgulhu no agradese ho instalasaun ne’ebé IDN instala hodi hakbesik Bee moos ba komunidade nia hela fatin bele suficiente ona ba sira asesu.
Enkuantu Clementino Freitas, nu’udar komunidade ida, sente haksolok hodi hato’o grasa wain maromak, tanba hetan ajuda ona hosi Institutu Defeza Nasionál (IDN) hodi konstrui no kanaliza Bé Moos hakbesik ba sira nia hela fatin, tanba antes komunidade sira ba kuru Bee Moos kuaze 500 kilómetru.
Partisipa iha serimónia ne’e, mai husi Reprezentante Prezidente Autoridade Munisipál Bononaru, Komandante PNTL Munisípiu Bobonaru, Reprezentante Bee TL hosi Bobonaru, Administradór Postu Bobonaru, autoridade local no Komunidade Suku IlatLaun.
1,790 total views, 3 views today
Bele hare Video Seluk :