(Reportajen Korespondente Manufahi, Luis Casimiro/Editor Mateus da Cruz)
Manufahi (Timor Post)– Forsa Falintil Defeza Timor Leste (F-FDTL) Komponente Naval, Postu Betano hasai saudozu Hilario da Costa Barreto kodigu Mauleru nia isin mate hosi nia rezidénsia Manu-Mera tula ba Karreta funeráriu hodi ba haloot iha semiteriu Kotalalora, Manu-Mera, Turiskai.
Reprezentante no Xefe Estadu Maior Forsa Falintil Defeza Timor Leste (F-FDTL), atual Sarjentu Polísia Militár (PM), komandante Tanente Lourenço José Cabral, kodigu Aquito, hatete, ohin povu Turiskai lakon osan mean boot ida, saudozu Mauleru iha ninia dedikasaun halo ona buat barak ba Timor to’o hetan independensia.
Nia hatete, maske saudozu laiha ona mundu ida ne’e maibé ninia dedikasaun ne’ebé halo iha funu laran nia halo buat barak ba rai ida ne’e sei la haluha.
“Hanesan Kompañia B sub rejiaun kruzeiru rejiaun III lakon osan mean bo’ot ida no ami mós lakon tanba ami nia moris sofrevivensia durante tinan 24 rai Turiskai mak kaer,” dehan ho triste iha semiteriu Kota Lalora, Turiskai, Domingo (13/03) hafoin partisipa iha serimonia funebre.
Tanba ne’e FALINTIL ne’ebé transferensia ba F-FDTL husi nasionál to’o iha baze sei lahaluhan saudozu ninia dedikasaun hodi sakrefika a’an durante funu.
Tempu hanesan reprezentante konsellu kombatente libertasaun nasionál, Napoleao da Costa kodigu Nazi hatete, kontribuisaun ne’ebé saudozu fó hodi harii Timor Leste sei lakon hosi jerasaun ba jerasaun.
“Ita nia saudozu Mauleru nia luta sei sai mós istória ba jerasaun foun sira iha futuru hodi nafatin temin nia naran saudozu Hilario da Costa Barreto kodigu Mauleru,”nia dehan.
Iha fatin hanesan Israel Pinto hanesan oan mane dahuluk hosi saudozu sente triste bainhira lakon aman ida iha família ida hodi ba moris fali ba fatin foun iha mundu seluk.
“Ami sente triste tanba lakon aman di’ak ida hosi sorin tanba nia mak akompana ami hosi ki’ik to’o bo’ot,”dehan Israel.
Nia haktuir, matebian sofre moras diabetes durante ne’e ba mai hospital hodi halo tratamentu to’o ohin loron nia mate.
Bainhira halo tratamentu matebian hasai nia osan rasik no hetan mós apoiu orsamentu hosi ministériu to’o nia mate, no governu mó apoiu orsamentu ho kaisaun hosi fatin ne’ebé nia haknar a’an ba.
Tuir observasaun Timor Post nota katak, seremonia funebre ne’e hetan partisipasaun masimu hosi prezidente konsellu municipal kombatentes libertasaun nasionál munisípiu Manufahi ho ekipa no administradór munisípiu Manufahi ho ekipa.
Enkuantu serimónia funebre ne’e hetan apoiu akompanamentu hosi Forsa Falintil Defeza Timor Leste (F-FDTL) komponente Naval postu Betano inklui hodi halo mós tiru teu hodi presta homenajen ikus ba saudozu.(Lee notisia seluk iha Timor Post/Asesu You Tube Timor post)
722 total views, 3 views today
Bele hare Video Seluk :
Subscribe to Timorpost
