(Reportajen Korespondente Manufahi, Luis Casimiro/Editor Mateus da Cruz)
AILEU—Asidente iha Aldeia Lerolisa, Suku Açu–Mau, Postu Remexio, Munisípiu Aileu, Sabadu ne’e, maizumenus oras tuku ida meiudia, rezulta vítima Beresimu Soares Mendonsa, labele salva vida hafoin motor Bebek Revo ho xapa matríkula J.0621 TLS, ne’ebé nia kondús monu no vítima tama liu ba valeta laran.
Komandante Polísia eskuadra Remexio, Inspetór Xefe Polísia, Helio de Deus, haktuir, motivu hosi asidente hodi rezulta vítima mate tanba rai namdoras.
Nia hatete, matebian hosi Dili tula sasán hanesan Rice Cooker rua, biti tolu kesi iha motor kotuk no sasán rahun balun tau iha motor oin atu hodi ba fa’an iha Remexio no vítima mos halai besik rai ninin nune’e rai namdoras namdoras rezulta matebian monu tun ba valeta kuak no mate fatin.
“Ami identifika mate ho kondisaun normál la lanu no impaktu hosi kondisaun estrada rai namdoras hodi rezulta matebian monu, vitima rasik labele salva vida tanba monu husi estrada tun ba mota kuak kuaze metru lima (5) nune’e ulun hetan pankada maka’as ba fatuk hodi mate fatin, “nia dehan ba Timor Post, Via Telefone.
Nia dehan, Polísia eskuadra rasik hetan informasaun hosi komunidade sira ne’ebé hela besik katak iha hetan joven ida maka mate iha valeta kuak, nune’e polisia tun kedas ba fatin akontesimentu hodi identifika.
Oras ne’e daudaun mate isin lori ona ba Hospital Nasionál Guido Valadares (HNGV) Dili, hodi tau ba kaixaun hafoin entrega ba família hodi ba halo halot iha vítima nia moris fatin Suku Manetu, Postu Administrativu Maubisse, Munisípiu Ainaro.
Sikun seluk, sasin Elidio Fernandes hosi Aldeia Lerolisa, Suku Açu-Mau, Postu Administrativu Remexio, Munisípiu Aileu, haktuir matebian monu estudante sira mak hetan.
“Hafoin estudante sira sai eskola hetan matebian monu nune’e fó hatene ba komunidade hodi foti sai matebian hosi valeta kuak”nia aprezenta.
594 total views, 6 views today
