(Reportajen Jaime Pires/Mariano Martins/Editor Mateus da Cruz)
Dili (Timor Post)- Ministra Negósiu Estranjeiru no Kooperasaun (MNEK), Adaljiza Magno, dehan, sidadaun timoroan sira iha Austrália, bele partisipa eleisaun prezidensiál tinan ne’e maibé bazeia de’it ba resenseamentu tinan kotuk nian, tanba tinan ida ne’e STAE la halo resenseamentu eleitorál foun.
Adaljiza Magno, informa ba jornalista sira iha Aeroportu Prezidente Nicolau Lobato, Komoro, kuarta (16/02) ne’e.
“Agora ita la hatene, maibé tinan ida ne’e STAE la halo resenseamentu foun ba sidadaun timoroan iha Austrália, maibé karik STAE ho CNE hakarak ba ita ba hamutuk hodi deside fó eleisaun ba sidadaun sira iha ne’ebá, maibé ba fó eleisaun prezidensiál ba sidadaun sira iha Austrália ne’e, bazeia de’it ba resenseamentu tinan kotuk nia tanba tinan ida ne’e la halo resenseamentu eleitorál foun.,” Nia dehan.
Nia hatete, iha dia 21 de Fevereiru agora Austrália loke ona tanba ne’e STAE no CNE bele ona halo kolaborasaun ho MNEK ba organiza eleisaun prezidensiál ba sidadaun sira iha Austrália.
STAE Koordena ho MNEK
Iha parte seluk, Sekretariadu Tékniku Administrasaun Eleitorál (STAE), halo hela koordenasaun ho Ministériu Negósiu Estranjeiru (MNEK) husi diresaun jerál asuntu embaixada no mós kontaktu ona ho embaixadór sira iha pais sira hotu inklui Australia hodi hahú organiza eleisaun.
“Iha Australia rasik ita halo kontinua hanesan sentru votasaun sira bai-bain ninian, agora hein de’it maka, tempu ba dezlokasaun ninian ne’e, tanba ne’e presiza transportasaun liu husi Aero,’ dehan Diretór Jerál STAE, Acilino Manuel Branco, iha ninia kna’ar fatin kaikoli, kuarta (16/02/2022).
Acilino hatete, daudaun ne’e ekipa STAE ajusta hela kalendáriu no prepara material sira molok arranka ba país sira inklui Australia hodi prepara ba eleisaun.
“ita ajusta hela ita nia kalendáriu, tentativa material sira husi Dili atu sai ba país sira ne’e inklui austrália, entre dia 11 ou 12 fulan Marsu,” nia afirma.
Nia hatete, ekipa sira ba eleisaun esforsu maka’as atu sidadaun timoroan hotu iha país sira bele hetan sira nia direitu ba votu maibe espera katak numeru kazu covid-19 sei la aumenta maka’as iha nasaun sira iha rai li’ur hodi impede prosesu sira ne’e.
“Mai se kazu to’o iha ne’ebá maka estasaun Covid-19 ameasa ba mundu tomak ha’u hanoin katak, ita hein fali ba Governu bele halo desizaun ruma maibé ita espera katak situasaun sei la to’o iha ne’ebá, hodi nune’e ita bele garantia direitu,” nia relata. (Lee notisia seluk iha jornal Timor Post/asesu youtube Timor Post)
573 total views, 3 views today
