(Reportajen Jose Mauno/Editor Mateus da Cruz)
DILI—Atu grupu arte marsiais no rituais sira iha Timor Leste bele sente iha dignidade no direitu nu’udar Timor oan, Kandidatu Prezidente Repúblika ho númeru sorteiu 1, Jose Manuel Ramos Horta, promete sei loke odamatan Palásiu Prezidente nian ba kualkér grupu arte marsiais sira hodi kontribui ba estabilidade no dezenvolvimentu nasaun.
“Ha’u nia odamatan iha palásiu sei loke ba imi para ita ko’alia grupu arte marsiais, arte rituais hotu-hotu”, informasaun ne’e Timor Post foti liu husi mídia SMNEWS bainhira kandidatu ne’e hala’o komísiu eleitorál ba segundu volta, iha Lifau, Oe-Kose ,Sábadu (02/04).
Nia dehan, sei simu grupu arte sira hotu atu nune’e joven sira bele servisu hamutuk ho estadu, governu no polísia para hametin liután seguransa iha rai ida ne’e.
Sidadaun hotu buka ideia oinsá bele sente iha dignidade, direitu iha futuru tanba joven hola parte arte marsiál, depois kaben iha oan tenke preokupa ho sira, no osan ba oan no feen. Labele lakon tempu ho violénsia ho ódiu, ida ne’e mak prezidente hakarak halo no ko’alia para hetan fatin, dalan para joven sira hetan esperansa duni no fiar ba futuru.
Iha Komísiu eleitorál ne’e, kandidatu Ramos Horta hetan apoiu polítika husi kandidatu Mariano Assanami Sabino Lopes, Anacleto Bento, no prezidente partidu CNRT, Kay Rala Xanana Gusmão, prezidente partidu PUDD Silvestre Sufa, sekretáriu jerál partidu PD, Antonio da Conceição “Kalohan” no seluk tan. (ono)
471 total views, 3 views today
