MANUFAHI (timorpost.com) — Akontese udan boot ho rai lakan iha Aldeia Kledik, Suku Fatukahi, Postu Administrativu Fatuberlio, Munisípiu Manufahi, rezultadu joven mane ida rai lakan fera.
Xefe Suku Fatukahi, Postu Administrativu Fatuberlio, Munisípiu Manufahi, Moises Acácio Pinto, informa rai lakan fera estudante ida iha nia area jurídiku.
Nia konfirma, ohin mais ou menus oras tuku 5:00 lokraik rai lakan fera estudante mane ida iha aldeia Kledik, Suku Fatukahi, Postu Fatuberlio.
“Sim, ohin rai lakan fera estudante mane ida hosi Postu Administrativu Alas, ne’ebé foin atu eskola iha koléjiu São Francisco de Assis Fatuberlio”, Acácio Pinto, informa ba Timor Post via telefone, Segunda Kalan (16/01).
Nia dehan, estudante ne’e hosi Postu Administrativu Alas, ne’ebé hela ho família iha Fatuberlio hodi eskola, matebian foin remata orientasaun iha eskola hori-bainrua no ohin ho nia maluk sira ba tiha eskola no lokraik mak hetan tiha asidente ne’e.
“Maski akontesimentu ne’e família ho parte polísia lori ba to’o ospitál, maibé matebian nia iis laiha ona”, nia hakotu.
Matebian husi Wesar, Aldeia Weberek Suku Dotik, Postu Administrativu Alas, Munisípiu Manufahi.
Tuir informasaun ne’ebé Timor Post rekolla husi terenu, katak matebian ho naran kompletu Natalino de Jesus ho idade 18.
Eskola hela iha Aldeia Kledik, Suku Fatukahi, ohin lokraik tuku 5:00 udan boot rai lakan tiru kona has hun ida, nune’e kona fali matebian hodi rezulta mate fatin.
Entretantu ba Manufahi, iha tinan 2023 akontese kazu suisidu ida iha suku Kaimauk, Postu Administrativu Turiskai no ohin akontese tan rai lakan fera joven estudante ida ne’e iha Aldeia Kledik, Suku Fatukahi, Postu Fatuberlio.
1,768 total views, 3 views today
