(Reportajen Korespondente Manufahi Luis Casmeiro/Editor Mateus da Cruz)
MANUFAHI— Komandante Komandu Polisia Nasionál Timor Leste (PNTL), Munisípiu Manufahi, Superintentedente, Joni Viana das Regras, hatete, membru hamutuk na’in 160 maka koloka ba sentru votasaun 94 iha Postu Administrative Alas, Turiskai, Same no Fatuberliu.
“Efetivu hirak ne’e ita hatún dezloka kada sentru votasaun iha suku rua nulu resin sia iha Manufahi hodi halo seguransa ba eleisaun iha aban ninian”, dehan, Joni ba Timor post iha arredores STAE, Manufahi, Segunda (18/04).
Nia hatete, hosi membru na’in 160 ne’e, na’in 20 apoiu husi komandu jerál no na’in 10 hosi Batallaun Orden Públiku kompañia Delta husi Munisípiu Bobonaru.
Entretantu komandu polisia ne’e husu ba membru polisia ne’ebé hetan kolokasaun ba sentru votasaun sira iha area rurais tenke atensaun ba estrada ho mota tanba oras ne’e klima udan.
“Iha fatin balun risku ba estrada no mota husu tau atensaun no tenke kumpre devér no obrigasaun responsabilidade to’o iha fatin sentru votasaun seguransa seguru nune’e ema hotu bele partisipa iha eleisaun ida ne’e”, nia dehan.
Nune’e nia esplika, iha eleisaun ida ne’e, komandu mós bandu membru sira ne’ebé destaka iha fatin votasaun atu labele halimar telemovel, labele hemu tua, maski la akontese maibé husu hadomi serbisu hodi tau atensaun ba situasaun refere iha terrenu.
Komandante polisia munisípiu ne’e hateten, membru sira tenke hatene saida mak krime eleitorál no oinsá atu regulariza tanba kódigu penal atus 229-242 sita ona tenke fó seguransa forte, nehek la besik no anin la huu sai surat tahan iha sentru votasaun, bainhira akontese signifika polisia laiha fatin no toba dukur.(Lee Notisia Seluk Iha Jornal Timor Post/ Asesu You Tube Timor Post)
332 total views, 3 views today
