Manatutu (timorpost.com) – Prezidénsia Repúblika, José Ramos Horta, apoia nesesidade bázika ba família atus rua (200), iha Postu Administrativu Laclo no Postu Administrativu Manatutu.
Tuir Komunikadu Timor Post Online, asesu Sábadu (10/12), katak apoiu ne’e kanaliza ba família hirak ne’e, tanba tinan rua ona la halo produsaun, hafoin dezastres naturais estraga to’os no natar iha loron 4 fulan Abríl tinan 2021.
Problema ne’e identifika husi Assesor Polítiku Prezidénsia Repúblika, Tomás do Rosário Cabral, hafoin halo monitorizaun iha àrea Laclo no Manatutu Vila.
Nune’e, Prezidente Repúblika, José Ramos Horta, orienta kedas ekipa hodi distribui ai-han nesesidade bázika sira-ne’e bá komunidade sira, hodi hein Institutu Jestaun no Ekipamentu Normaliza irrigasaun ne’ebé hetan estragus.
“Lori apoiu umanitáriu ne’ebé Prezidente entrega hela, ba sira iha área ne’e, tanba sira hetan afetadu husi dia 4 Abríl tinan rua liubá, estraga natar barak tebes, irrigasaun mós ladún la’o di’ak, komunidade sira uza de’it ai-han lokál ne’ebé iha hanesan akar,” hateten Xefe Ekipa Prezidénsia Repúblika, Júlio Gonçalves.
Júlio hatutan, Prezidénsia Republika, sei tulun mós komunidade iha àrea Bazartete, Munisípiu Likisá, Bobonaro, Aileu no no Koléjiu Madre iha Postu Administrativu Soibada, Munisípiu Manatutu ne’ebe hasoru problema hanesan.
Sorin seluk, Xefe Suku Laicore, Postu Administrativu Laclo, Munisípiu Manatutu, Zeltino Tino do Rosário Cárcerres, agradese Xefe Estadu, Ramos Horta, ne’ebé tulun komuidade sira, tanba tinan rua ona la halo to’os no natar.
“Nu’udar autoridade Suku Laicore, Postu Administrativu Laclo, ha’u agradese Gabinete Prezidente, tanba durante loron hirak husi Asessór Prinsipál mai halo monitorizasaun iha ami-nia suku, tanba durante inundasaun ami suku Laicore hasoru difikuldade bo’ot bee sa’e natar durante tinan rua ona komunidade sira la hetan hahán,” hateten Xefe Suku Laicore.
Reprezentante Komunidade Afetadu, José Kai Soares sente kontente tanba bele hetan apoiu nessesidade bázika husi Prezidente Repúblika, José Ramos Horta.
“Ami nu’udar komunidade Rembor, ami sente haksolok tebes, orgullu tebetebes no obrigadu barak bá na’i Prezidente ne’ebé fó apoiu fo’os, mina, supermi,” hateten José Kai.
Nia hatutan, durante ne’e povu agrikultór iha aldeia Ilihuli, Suku Iliheu Postu Administrativu Manatutu Villa hasoru difikuldade no han de’it akar, hafoin sira-nia natar kuaze ektares 500 resin hetan estragus husi mota.
Entretantu, apoiu ai-han bázika ne’ebé Prezidente Repúblika fó bá komunidade afetadu sira hanesan fo’os sakas 400, supermi dos 400 inklui mina bimoli lítru rua hamutuk 400.
776 total views, 3 views today
