Manatuto (timorpost.com) – Segundu Komandante Polisia Nasionál Timor-Leste (PNTL), Munisípiu Manatuto, Domingos Gregório Soares, hatete sira garante segurasa durante komemorasaun loron Proklamasaun Independénsia ba da-47 nian.
Nia hatete, situasaun jerál kona-ba seguransa iha area Jurídiku Munisípiu Manatuto la’o ho di’ak no hakmatek.
“Ami komandu PNTL Munisípiu Manatuto, ami halo seguransa másimu hadulas fatin serimónia komemorasaun Proklamasaun Independénsia ba da-47 nian, atu nune’e serimónia bele la’o ho di’ak,” nia hateten iha fatin serimónia iha Munisípiu Manatuto, Segunda (28/11).
Nia dehan, iha seguransa ne’e, hetán apoiu mós hosi Komandu Jerál hosi Polísia Militár, Polísia Tránzitu Nasionál, nune’e mós FALINTIL-Forsa Defeza Timor-Leste (F-FDTL).
Nia afirma, totál membru PNTL ne’ebé Komandu Jerál apoiu mai iha loron komemorasaun Proklamasaun Independénsia ba da-47 ne’e sira labele fó sai.
“Ami seguransa ba atividade komemorasaun loron Proklamasaun Independénsia ba da-47 ne’e to’o lokraik, depois sei kontinua asegura seguransa iha eventu feira iha Manatuto,” nia hateten.
Enkuantu membru iha komandu Munisípiu Manatuto ne’ebé halo seguransa ne’e kompostu husi Eskuadra sira hotu.
Istória badak
Loron proklamasaun independénsia 28 Novembru 1975, nudár afirmasaun povu Timor-Leste nian atu hasoru Indonézia nia ambisaun atu invade Timor no kontra mós kolonializmu husi Governu Portugés.
Momentu ne’ebá Portugál abandona tiha territóriu Timor Portugés ho sees an ba Illa Atauro. Maski refleta duni povu nia aspirasaun ba ukun rasik an, proklamasaun ne’e unilaterál husi partidu FRETILIN tanba laiha unidade ka maneira Pasífiku atu la’o ba oin entre partidu sira.
Nudár konsekuénsia husi situasaun polítika ne’e – Portugal nia la sériu ba akompaña Povu Timor ba deskolonizasaun, ambizaun Indonézia nian no konflitu entre partidu polítiku sira, militár Indonézia halo invazaun iha loron 7 Dezembru 1975.
1,384 total views, 9 views today
