DILI (Timor Post) – Vise Prezdente Parlamentu Nasionál (VPPN), Maria Angelina Sarmento ho família hetan asidente ho karreta marka Parlamentu Nasionál iha Munisípiu Manatuto.
“Sim, ha’u hetan informasaun asidente ne’e ha’u orienta kedas Ambulánsia rua sa’e ba hodi evakua kedas ba sentru saúde Postu Administrativu Laklubar Munisípiu Manatuto,” dehan Diretór Saúde Munisípiu Manatuto, Mateus Vicente Correia ba Timor Post liuhusi Telefónika, Kinta (18/08).
Nia sehan, hafoin halo tiha observasaun durante minutu 30 nia laran, ambulánsia rua husi Postu Saúde Laklubar mai hasoru malu ho ambulánsia husi Munisípiu Manantu nian iha dalan Klaran hodi lori kedas ba iha Hospital Nasionál Guido Valadares (HNGV).
“Tuir ha’u-nia observasaun Vise Prezidente Parlamentu Nasionál nia kondisaun di’ak hela, maski hetan pankada uitoan iha parte kotuk laran no ain nian, maibé nia kondisaun di’ak hela,” hateten nia.
Tuir informasaun ne’ebé Timor Post hetan, Vise Prezidente Parlamentár Nasionál, Maria Angelina Sarmento, hetan asidente iha Laklubar hodi lori dokumentus balu atu halo preparasaun akompaña Kardeál Dom Virgilio do Carmo da Silva, atu ba Roma Itália ne’e mak, iha dalan hetan asidente.
Enkuantu asidente ne’e akontese iha Postu Administrativu Laklubar, Munisípiu Manatuto maiz ou menus tuku 08 resin oras Timor-Leste nian.
Entretantu tuir Komunikadu ne’ebé Timor Post, asesu katak, iha dia 17 de Agosto de 2022 oras tuku 8 kalan akontese asidente Vise Prezidente Parlamentu Nasionál, monu ho karreta Parlamentu nian iha área Bua-lo, aldeia Tori-lalan, Suku Orlalan, Posto laklubar.
Karreta refere ne’ebé hetan asidente konduz husi Vise Parlamentu nia katuas oan rasik. Ema ne’ebé asidente hamutuk 4 pessoas, kompostu Vise Parlamentu hetan sofre iha parte hirus matan, kanotak no ain rua maibé lá tohar. Nia katuas oan hetan sofre iha parte hirus matan. Oan mané hetan sofre kanek iha parte Ulun. No oan feto nia ain mak bubu.
Motivu husi Asidente refere tanba Vise nia katuas oan kondus karreta hola liu husi estrada ninin ne’e duni Raí mamar hodi rezulta karreta baku fila.
Hafoin hetan asidente komunidade sira ne’ebé hela besik fatin akontesimentu informa kedas liuhusi telefone ba Xefe Saúde hodi orienta kedas ambulánsia ba evakua vítima Asidente sira ba Hospital Sentru Saúde Laklubar no oras ne’e ambulánsia Laklubar kontinua lori sira ba Hospital Nasionál Guido Valadares.
2,734 total views, 6 views today
