DILI (timorpost.com) – Tanba rona Governu atu hapara konstrusaun ba Uma Kbiit Laek (UKL) iha ba Benefisiáriu António da Crus, iha Suku Serelau, Administradór Munisípiu Lautem, Domingos Savio, hatete laiha ema ida atu hapara projetu iha Lautem.
Nia hatete, konstrusaun Uma Naroman ba Povu (UNP) iha Suku Serelau, laiha ema ida atu taka konstrusaun refere, tanba ne’e direitu ema hotu nian.
“Horisehik ha’u simu kontaktu katak, tan de’it ema dada Bandeira CNRT iha uma kakuluk mak hapara projetu ne’e, ha’u hatán dehan laiha ema hapara projetu iha Munisípiu Lautem”, nia hateten hafoin partisipa Aniversáriu F-FDTL ba-22 iha Fatu-hada, Kinta (02/2).
Nia dehan, laiha autorizasaun husi Administradór Munisípiu, laiha ema ida atu hapara projetu refere, nu’udar sidadaun se de’it envolve kualkér partidu iha diretu atu hetan Uma Naroman ba Povu.
Nia esplika, partidu ne’e buat ketak, programa UKL ne’e buat ketak ida, sidadaun vulneravel hotu-hotu iha diretu atu hetan, ne’e programa Governu nian.
“Ha’u mós bolu ona Diretór PNDS no nia esplika la’ós atu hapara, konstrusaun la’o hela, tan de’it dada Bandeira iha uma kakuluk, entaun hapara lai atu rezolve problema ne’e”, dehan nia.
Nia haktuir, tuir loos Xefe Suku Serelau hatene ierarkia, konsidera Administradór Munisípiu Lautem, iha Lautem iha ema ida mak ukun, nia hatene situasaun labele mai direita nasionál hodi hato’o keixa.
“Tanba ne’e, informasaun falsu la’ós hapara, ha’u bele rezolve problema, nusa mak labele, ha’u iha ne’ebá atu halo saida, iha ha’u-nia area jurídiku kualkér problema ha’u mak rezolve”, katak nia.
Administradór ne’e afirma, relasiona ho aktu ne’ebé akontese katak, Diretór PNDS atu hapara projetu UNP ne’e, hanesan Administradór la hetan informasaun husi xefe suku.
“Se mak dehan atu hapara, ne’e la’ós kompañia privadu mak atu hapara, ne’e programa Governu nian ba povu tomak”, katak nia.
Domingos afirma tan katak, konstrusaun ne’e kontinua la’o, tanba ne’e programa Governu nian atu fó ba Povu ne’ebé kbiit laek, Diretór se mak atu hapara, se hapara Administradór sei foti desizaun hapara Diretór refere husi nia kargu.
3,257 total views, 6 views today
Bele hare Video Seluk :