Laútem (timorpost.com) – Tanba sasán nesesidade báziku sa’e iha merkadu, Kompradór sira hosi Postu Administrativu Lospalos, Munisípiu Lautem konsidera Governu hakarak haterus nia povu.
Sidadaun Berta Cabral, hatete sasán nia folin iha merkadu agora la normal ona, tanba negosiante sira hasae tuir sira nia gostu de’it.
“Ami mai ezije iha loja na’in atu hatún sasán nia folin, tanba folin la normal hanesan bain-bain,” nia hateten ba Timor Post iha merkadu Lospalos, Sesta (13/01).
Nia dehan, foos tempu uluk dolar 13 USD, agora sa’e liubá dolar 16 no 19 USD, Bimoli 0,50 centavus sa’e ba 2 USD.
“Ami husu ba negosiante sira atu bele hatún sasán nia folin, tanba selae ami laiha kbiit atu bele sosa”, nia hateten “0Se ida ne’e desizaun Governu, entaun ami povu lamenta ho polítika ida ne’e, tanba bele haterus ami-nia moris”.
Nune’e nia dehan, hanesan komunidade no povu husu ba Governu liuliu ministériu kompetente atu tau atensaun makas ba situasaun ekonomia iha rai laran hodi nune’e labele haterus povu kbiit laek sira.
Iha fatin hanesan, Negosiante Super Merkadu, Julio Manuel, onestu katak sasán folin sira hasae duni tanba tuir realidade merkadu nian.
“Sasán importasaun sira ne’ebé ha’u fa’an iha kioske ka loja, la’ós ha’u na’in rasik mak hakarak hasa’e nia presu, maibé ne’e hosi nasionál kedas,” nia hateten.
Nia dehan, hanesan negosiante fan tuir sasán ne’ebé sira ba hola, se iha nasionál sa’e ona, entaun mai iha munisípiu mós tenke hasae hodi bele hetan uitoan.
“Ita haree sasán importasaun hirak ne’ebé importa husi rai li’ur, hanesan Indonézia, Singapura, Xina, no seluk tan, sira importa mai ho folin karun, entaun ami mós la’o tuir ho presu ne’ebé iha,” nia subliña.
Nia haktuir, komunidade sira ba ezije tanba saida sasán folin ne’e karun demais, keta fa’an tu’ir gostu, maibé hanesan negosiante atu dehan fan tu’ir lei no hetan rekoñesimentu husi Governu, la’ós mai fa’an tu’ir gostu.
Tanba sasán importasaun ne’ebé tama mai iha Timor-Leste, realidade ema hotu haree presu sa’e husi nasionál, rejionál, to’o mai lokál, tanba ne’e mak sira hanesan negosiante la’o tuir prosesu ne’ebé iha.
3,394 total views, 6 views today
Bele hare Video Seluk :