DILI (timorpost.com) – Organizasaun Naun Governmental (ONG) Frontline hamutuk ho Autoridade munisípiu Ermera no Autoridade Servisu Saúde munisípiu Ermera organiza kampaña ho objetivu atu redús mortalidade inan iha munisípiu Ermera.
Liuhosi komunikadu imprensa ne’ebé Timor Post asesu hosi ONG Frontline katak, hosi loron 04 fulan Setembru to’o loron 13 fulan Outubru 2023, sei hala’o kampaña ida ne’ebé ho objetivu atu hamenus taxa mortalidade maternal no infantíl liuhosi kolaborasaun ho ONG Frontline hosi Japaun, nune’e mós ho Servisu Saúde no Autoridade Munisípiu Ermera.
Kampaña ida ne’e aliña ho loron hanoin hikas fali Inan isin rua no bebé ne’ebé lakon sira nia vida ne’ebé mundu internasionál relembra fila fali iha loron 15 fulan Outubru ho tema “Próteze Inan no Bebé Sira Liuhosi Kuidadu Kontinua iha Fasilidade Saúde”.
Alvu hosi kampaña ida ne’e, ba komunidade lokál no profisionál saúde sira iha munisípiu Ermera ho objetivu prinsipál tolu, ida mak hasa’e konsiensia inan sira kona-ba planu partu, rua mak hasa’e konsiensia kuidadu kontinua ba partu ho seguru no tolu mak hasa’e konsiensia pesoál saúde hodi fornese kuidadu no kualidade.
Durante períodu kampaña, pesoál saúde sira no ekipa Frontline no mós servisu saúde munisípiu Ermera sei vizita suku 16 iha munisípiu Ermera laran. Sira sei hala’o atividade sensibilizasaun kona-ba saúde inan no oan, fornese kuidadus antenatal ba inan isin rua sira, konsultasaun jerál, vasinasaun, ezaminasaun pediátrika, no mós halo ekografia ba inan isin rua hosi médiku sira ne’ebé kompeténsia ona iha formasaun ekografia nian ne’ebé hala’o hosi Frontline no INSP-TL.
Aleinde ne’e, sei organiza mós semináriu ne’ebé foka liu ba étika komunikasaun durante ezaminasaun médiku ba fornesedor saúde sira.
Iha loron ikus kampaña ne’e nian, loron 13 fulan Outubru, sei hala’o selebrasaun “Pregnancy and Infant Loss Remembrance Day” iha fatin ETCI iha kapitál Gleno.
Eventu ne’e sei iha konsultasaun jerál no ezaminasaun ekografia ba inan isin rua ne’ebé halo hosi médiku sira hosi munisípiu refere, nune’e mós sei iha barak hosi organizasaun sira seluk ne’ebé relasiona.
Aleinde ne’e, sei hala’o mós marsa advokasia kona-ba saúde maternal no infantíl iha kapitál Gleno nia laran.
Kampaña ne’e sei hahú hala’o iha loron 04 fulan Setembru ho serimónia abertura kampaña ne’ebé sei hala’o iha suku Fatubolu ho oras 09:00 dadeer iha loron hanesan.
2,212 total views, 117 views today
