DILI (timorpost.com) — Uniaun Estudante Universitáriu Munisípiu Ermera (UNEUMER), hanesan organizasaun voluntáriu, kamadas de Akadémiku, ne’ebé halibur Estudante Universitáriu Ermera oan tomak, husu Magnifiku Reitór East Timor Coffe Institute (ETCI), relasiona ho prolema ne’ebé agora iha ETCI hasoru hodi suspende totál atividade Akadémiku, liuliu prosesu aprendizajen ne’ebé paradono suspende totál, kuaze fulan ida liu ona.
Relasiona ho kestaun ne’ebé Organizasaun UNEUMER hato’o ba públiku, tanba Asaun Estudantes East Timor Cofee Institute (ETCI) 28-09-2022 iha Ermera Gleno, ne’ebé Timor Post Online asesu iha pajina Facebook Cepattetap Dantajam.
Razaun kona-ba suspende atividade Akadémiku iha ETCI, bazeia ba kronolojia mak hanesan, falta Fasilidade Aprendijajen, Rekursu Umanu limitadu, falta ekipamentu Laboratóriu, laiha seguransa sosiál ba dosente sira, inklui funsionáriu hotu seidauk hetan direitu kuaze fulan tolu (3) liu ona.
“Ho kronolojia hirak ne’e mak, ami husi UNEUMER konsiente katak, ida ne’e hanesan problema sériu ne’ebé fó impakto boot tebes ba povu Agrikultór no Ai-leba nia oan sira ne’ebé daudaun ne’e asessu hela estudu iha ETCI sai vítima, tanba mundu ohin loron dezenvolvimentu edukasaun avansadu tebe-tebes,” nia hateten.
“Maibé Magnifiku Reitór ETCI ho nia estrutura hamutuk ho fundasaun CAFÉ LAHER irresponsalidade, hodi abandona tiha povu Agrikultór no Ai-Leba nia oan sira ne’ebé oras ne’e hala’o hela estudu iha ETCI kuaze fulan ida liu ona,” lia hirak ne’e hato’o husi Xisto Alves do Santos, nu’udar Portavoz iha organizasaun UNEUMER halo Konferensia Imprensa iha Jardin 5 de Maiu, Kolmera, Sesta (30/09).
Nune’e UNEUMER ninia haree katak, la fó resposta totál ba Dekanu, Xefe departamentu ho estudante sira nia ezisensia, ne’ebé hahú husi loron 14 fulan Jullu tinan 2022, to’o iha Konferénsia Imprensa ne’ebé akontese iha loron 15 fulan Setembru tinan 2022 no to’o fali minutu ida ne’e seidauk iha resposta klaru, tanba neé mak ohin liu husi Konferénsia ida ne’e UNEUMER, reafirma fila fali hato’o sira-nia ezijensia.
“Ami husu no ezije ba Magnifiku Reitór ETCI tenke fó ona resposta apartir solusaun imediatamente ba problema ne’ebé ETCI enfrenta hela, hodi suspende totál atividade akademiku liuliu prosesu aprendizajen kuaze fulan ida liu ona. Ami ezije mós ba fundasaun Café LAHER tenke foti asaun ho sériu ba problema ne’ebé estudante povu Agrikultór no Ai-leba nia oan enfrenta daudaun ne’e iha ETCI,” Xisto relata.
UNEUMER husu ho obrigatoriamente ba Magnifiku Reitor ETCI ho nia estrutura hamutuk ho fundasaun CAFÉ LAHER fó ona solusaun hodi reativa fila fali prosesu aprendizajen iha tempu badak, atu nune’e povu Agrikultór no Ai-leba nia oan sira bele ezerse fali sira direitu iha prosesu aprendijajen, tanba sira sempre kumpre sira-nia dever pagamentu propinas kada semester, la iha deve $1 dolar ka $2 dolar.
“Ami husu ba estrutura intimu ETCI nian ho fundasaun Café LAHER responde mós funsionáriu no dosente sira-nia direitu ne’ebé seidauk asessu durante fulan tolu liu ona. Ami husu ba Magnifiku Reitór ETCI ho nia estrutura hamutuk ho fundasaun CAFÉ LAHER atu hatan ba akizisaun hanesan fasilidade aprendijajen, Rekursu uumanu, ekipamentu Laboratóriu, internet, biblioteka, estajiu serbisu sosiál no estajiu pedagogia, ne’ebé hato’o ona ezijensia husi dekanu fakuldade Xefe Departamentu, corpos docentes no funsionáriu sira iha loron, 12 fulan Setembru tinan 2022, tanba buat hirak ne’e nu’udar fatór importante ne’ebé tenke estabelese duni iha instituisaun ETCI,” Xisto haktuir.
Alende ne’e mós UNEUMER husu ho respeitu Magnifiku Reitór Instituisaun ETCI ho fundasaun CAFÉ LAHER laiha ona kapasidade jestaun de lideransa ba instituisaun privadu ida ne’e (ETCI), di’ak liu koopera hodi halo remodelasaun ba Reitór foun hodi jere instituisaun ETCI ba futuru ida di’ak liu iha Munisípiu Ermera ba Timoroan tomak.
“Ami hakarak hato’o ba Magnifiku Reitor ETCI katak, labele alerjia de’it ho kargu Reitór hodi haluhan tiha responsabilidade nu’udar nain ba instituisaun,” Xisto hatete.
Tanba ne’e UNEUMER rekomenda ba Magnifiku Reitór labele nonok no rona de’it saida mak agora estudante ho dosente sira efrenta iha ETCI no hanesan Magnifiku Reitór prezensa mosu iha kampus ETCI labele hanesan bainaka. No mós Magnifiku Reitór ho estrutura hamutuk Fundasaun CAFÉ LAHER trata lalais asuntu hirak ne’e ho sériu no dignu ba korpos dosesnte no estudante sira iha ETCI.
“Rekomenda ba dekanu fakuldade sira, Xefe Departamentu, korpo dosente sira hotu nafatin fuan boot no pasiensia hodi buka nafatin solusaun. Nune’e mós rekomenda ba estudante ativu hotu iha ETCI konsolida nafatin unidade hodi luta defende imi-nia direitu iha ETCI. Rekomenda ba parte relevantes sira loke matan hodi haree, tilun hodi rona kestaun hirak ne’ebé estudante enfrenta iha ETCI daudaun ne’e,” Portavoz Xisto hakotu.
2,670 total views, 3 views today
Bele hare Video Seluk :
Subscribe to Timorpost
