Jornalista Mj8/Editor Suzana Cardoso
GLENO (Timor Post) – Maski iha situasaun pandemia Covid-19 nia laran, maibé East Timor Coffee Institutu (ETCI) konsege gradua tan estudante hamutuk na’in 110 hodi kontribui ba dezenvolvimentu Estadu Demokrátiku Timor-Leste (TL) nian.
“ETCI husik imi na’in 110 hodi fila ba imi nia knua, ne’e mak komunidade. Lori imi nia siénsia, skill no matenek ne’ebé hetan ona ba aplika. La bele basa hirus matan, katak imi mak matenek liu. Tanba siénsia iha area rurais dala ruma sei la natoon kompara ho esperiénsia.”
Lia fuan hirak ne’e hato’o hosi Reitór ETCI, Lucio Marcal Gomes iha nia diskursu serimónia graduasaun iha salaun Nosa Señora da Graça Gleno, Segunda (25/10/2021).
Nia hateten, inan aman iha area rurais balun la hatene hakerek namoos lee. Maibé sira nia pratika makas liu fali imi hirak ne’ebé estuda iha universitáriu. Durante iha knua hamutuk ho inan aman no moos komunidade tenke iha kombinasaun entre pratika no matenek.
Tuir Reitór Lucio, sertifikadu ne’ebé oferese hanesan enxada ho besi hosi inan aman hodi ba ke rai. Sertifikadu ne’e para buka moris. Laos atu ko’us de’it. No parabéns ba sira ne’ebé kria kampu servisu ba an rasik, hanesan empreza.
“Hanesan empreza, balun prepara atividade halo adubu orgániku. Ne’e sai hanesan ezemplu ida. Katak sira la ko’us sertifikadu hodi ba buka servisu. Maibé sira hakarak kria rasik servisu ba an rasik,” dehan Lucio.
Iha fatin hanesan laureadu Novel da pás, Jose Ramos Horta hateten, dezafiu ba Timor-Leste (TL) maka akomula graduadu sira sai husi universitáriu. Daudaun ne’e mundu hasoru pasiénsia ba teknolojia.
Dehan Ramos Horta, atu tama ba Asean, Timor-Leste tenke iha ema kualifikasaun iha merkadu servisu ASEAN nian. Nune’e parabéns ba inan aman, reitór ho ninia korpu dosente ne’ebé ho pasiénsia hanorin hodi loke dalan ba fó matenek.
Graduadu na’in 110 ne’e mai husi fakuldade tolu no departamentu sia hosi ETCI ne’ebé harii hosi Oscar Lima ho Ermera oan balun. ETCI hari’i iha loron 13 Maiu 2003 ne’e hala’o ona graduasaun ba dala haat.(mj8)
786 total views, 3 views today
Bele hare Video Seluk :
Subscribe to Timorpost
