Dili(timorpost.com)—Vise Ministru Interior (VMI), António Armindo, hakarak halo tiha inaugurasaun ba postu Unidade Patrullamentu Fronteira (UPF) neen ne’ebé iha Fronteira ne’ebá, molok sira nia mandatu remata.
Nia dehan, durante ne’e sira halo postu iha fronteira ne’ebá lubuk no balun konsege finaliza ona, hosi orsamentu Covid-19 ninian no komplementa hosi parseiru TLPDP, entaun konsege konklui ona postu fronteira sanulu resin.
““Postu neen ne’e, ita uza osan estadu ninian mak agora kontinua la’o hela, tanba sira nia material balun presiza importa mai hosi Austrália no Indonézia tuir kompañia sira ninian deklarasaun, tanba ne’e mak agora kontinua la’o hela kuaze to’o ona porsentu 20 no balun besik remata ona”, hatete António Armindo, iha Ministériu Finansas, Aitarak-Laran, Sesta (17/03).
Nia dehan, Postu Unidade Patrullamentu Fronteira neen ne’e mak hanesan, Mota Ain, Tunu Bibi, Sakato, Oesilo, Citrana no Mota Masin.
Nia dehan, tanba ne’e sira nia parte hanesan ministériu kontinuasaun ezije ba kompañia sira ne’ebé mak responsavel konstrusaun ba Postu Unidade Patrullamentu Fronteira sira ne’e bele finaliza lalais konstrusaun, maibé konstrusaun sira ne’e hatudu progresu di’ak.
“Ministériu ninia ezije ba iha kompañia sira ne’ebé mak responsavel ba konstrusaun ne’e pelumenus bele finaliza lalais molok mandatu ida ne’e remata, atu nune’e ita hakarak inaugura tiha mak ita foin bele sai, tanba ita lakohi husik hela ita nia obra sira ne’e”, nia deklara.
Tuir António, tanba projetu sira ne’e tinan kotuk ninia mak kompañia sira halo seidauk hotu, maibé kestaun, tanba iha momentu ne’ebá Covid-19 no buat sira ne’e hotu entaun agora atrazu uitoan, maibé progresu hatudu la’o di’ak loos.
Kona-ba ekipamentu polísia ninian liga liu ba iha UPF sira kontinua uza arma sira ne’ebé uza tinan naruk ona, ne’ebé kestaun sensitivu uitoan, maibé governu haree ona kestaun sira ne’e no sei iha mudansa ba ida ne’e.
“Ha’u hanoin ida ne’e sensitivu uitoan governu liuhosi Ministériu Interior no Primeiru Ministru rasik mós hatene no haree ona katak, sasán sira ne’e la merese ona atu uza, ne’ebé governu iha ona planu, fiar katak sei iha mudansa tinan ida ne’e nia laran”, nia esplika.
Nia subliña, iha tinan ida ne’e nia laran mak sei iha mudansa, maibé depende iha governu ida ne’e nia mandatu ka governu sira tuir mai ne’e, maibé planu ne’e iha no la’o daudaun ona hein katak molok tinan ida ne’e remata sira hetan ona ekipamentu sira ne’ebé foun.
561 total views, 24 views today
