Dili (timorpost.com) – Komunidade uma-kain hamutuk lima (5) iha Suku Lahane Oriental, Postu Administivu Na’in-Feto, Munisípiu Dili, enfrenta dezastre naturais hahú iha Fulan Dezembru 2022 to’o semana kotuk.
“Uma-kain Lima ne’ebé sofre ba dezastre naturais hahú iha Fulan Dezembru 2022 to’o iha Fulan janeiru 2023, ne’e seidauk hetan materiál hodi bele halo kontrusaun ba sira-nia uma”, Xefi Suku Lahane Oriental, Trindade do Amaral Pinto Baptista, hateten iha Kaikoli, Kuarta (18/01).
Nia dehan, komunidade Uma-Kain Lima mak sai vítima ba dezastre naturais ne’ebé akontese iha fulan kotuk, barak mak hetan ona apoiu maibé apoiu ai-han de’it, seidauk hetan material atu bele halo kontrusaun ba sira-nia uma, entre uma-kain lima ne’e rua husi aldeia Temporal ho aldeia Tuba Rai mak hetan ona apoiu husi Protesaun Sívil ba Emerjénsia ai-han nian.
“Vítima dezastre naturais sira ne’e la evakua ba fatin seluk maibé balun ne’ebé uma la aproveita sira tenke tahan hodi hela hamutuk ho Viziñu nia uma no vítima balun prega rasik sira-nia uma hodi bele fó espasu ba sira nia moris”, nia tenik.
Autoridade Komunitariu ne’e informa, bainhira dezastre ne’e akontese nia kontaktu kedas ho Autoridade Protesaun Sívil to’o kedas iha fatin akontesimentu, entre vítima sira ne’e aldeia tolu hanesan aldeia Sare, aldeia Rai Mean no Aldeia Suhu Rama, mak seidauk hetan atendimentu tanba Protesaun Sívil sei haree no halo atendimentu ba komunidade hirak ne’ebe ho kondisaun grave liu.
Maibé, Nia hatutan lasignifika sira atu husik komunidade afetada sira, maibé Protesaun Sívil hamutuk ho ekipa sei tun fali hodi halo konfirmasaun.
“Husu ba Governu tenke tau matan lalais ba povu ne’ebé sofre husi dezastre naturais ne’e, labele birokrasia demais, tanba sira tuur iha Parlamentu ne’e povu mak hili, nune’e la’ós ko’alia kona-ba polítiku no kor partidu nian maibé tenke haree mós ba situasaun sira ne’ebé povu enfrenta”, nia salienta.
1,718 total views, 3 views today
Bele hare Video Seluk :
Subscribe to Timorpost
