DILI (timorpost.com) – Lider Karizmátiku Kay Rala Xanana Gusmão, Kinta (24/11), tun direta ba haree inan faluk Veronica Xavier nia hela fatin iha Aldeia Bedois, Suku Kamea, Postu Administrativu Kristu Rei, Munisípiu Dili.
Hafoin halo observasaun ba inan faluk ne’e nia uma ne’ebé Tribunal halo notifikasaun iha loron Sesta (11/11), Lider Nasionál ne’e, hatete justisa la los ona no la tuir lei ne’ebé iha.
“Ha’u hakarak justisa ne’e to’o iha ne’ebé, ha’u la haree ba kór no la haree ba família, maibé hakarak justisa ne’e haree lia los no la bele sosa osan ho Justisa, nune’e mós justisa ba ema ki’ik tenke justu no loloos,” dehan Xanana hafoin observa inan faluk Veronica Xavier nia uma iha Bedois, Kinta (24/11).
Nia dehan, ba vítima inan faluk Veronica Xavier ho nia oan no Bei-oan sira, katak bainhira parte Tribunal hasai obrigatóriu no vítima la hetan direitu ba uma ne’e, Xanana Gusmão husu vítima atu fó hatene ba nia, atu nune’e Xanana mak ba toba hein inan faluk Veronica Xavier nia uma, ne’ebé Tribunal fó notifikasaun.
Iha fatin hanesan, Inan Faluk Veronica Xavier, hatete ohin mais ou menus iha oras tuku 06:00 dadeer-san, nia ho oan no bei-oan sira ba hasoru Lider karizmátika Xanana Gusmão iha rezidénsia Lesidere hodi hato’o sira-nia problema no bazeia notifika husi Tribunál no mós hato’o sira problema entre hela fatin, tanba daudaun ne’e sira seidauk hetan fatin provizóriu ruma.
Nia konta hafoin sira hato’o problema ne’e, Avó Nana, komunika kedas ba iha advogadu Miguel, hodi haree dokumentu, hanesan notifikasaun husi Tribunál no rekursu ne’ebé defensór hatama ba iha Tribunál.
Nia informa, sira-nia parte seidauk hatene katak advogadu Miguel mak atu kaer kazu ne’e, maibé ohin sira rona katak avó Nana bolu advogadu ne’e atu haree took sira-nia dokumentu refere.
“Avó Nana ohin dehan ba ami katak, nia mai haree vítima sira iha Bedois, la’ós hanesan lider, maibé nia hanesan sidadaun ba rai ida ne’e, hodi mai haree nia maluk sidadaun ne’ebé hasoru problema no difikuldade iha terrenu,” nia konta.
Enkuantu tuir observasaun média Online Timor Post, iha oras tuku 11:45, Lider Karizmátiku Kay Rala Xanana Gusmão, to’o kedas iha inan faluk Veronica Xavier nia hela fatin hodi haree mós sira-nia hela fatin provizóriu ne’e.
3,943 total views, 3 views today
Bele hare Video Seluk :
Subscribe to Timorpost
