DILI (Timor Post) – Governu liuhusi Autoridade Munisípiu Dili (AMD), hala’o serimónia inaugurasaun ba Sede Suku Akadiru-Hun, Postu Administrativu Nain-Feto, Munisípiu Dili.
Adjuntu Autoridade Munisípiu Dili (AMD), Antonio Monis Clau, hatete serimónia inaugurasaun ba Sede Suku Akadiru-Hun, projetu ne’e pedidu hahú husi Fulan Setembru tinan 2021, ne’ebé loloos ne’e hotu Konstrusaun ne’e iha Fulan Novembru tinan kotuk, maibé iha fallansu ne’ebé Kompañia Fitun Roman Polmar Unipesoal-Lda enfrenta, entaun foin finaliza Konstrusaun no entrega ona ba sira.
Konstrusaun ida ne’e ho orsamentu porvolta rihun 52 USD, ho nia largura 12 Por 10, au-mézmu tempu ohin Autoridade Munisípiu Dili, esforsu entrega meza rua ho kadeira rua ba sira atu nune’e hala’o sira-nia servisu.
“Uma ka sede ida ne’e Povu nia Uma, Estadu hari ho osan Povu nian, portantu entrega ba Konsellu Suku, Xefe Suku ho Autoridade sira iha Suku Akadiru-Hun ho Komunidade sira hotu atu nune’e uza sasán ho di’ak no kuida hodi nune’e ita bele uza ho tempu naruk”, nia hateten iha sede Suku Akadiru-Hun, Bidau, Sesta (12/08).
Alende ne’e Xefe Suku, Juvinal Conceição, hatete ohin dadeer-san tuku 9:00 ho balun hahú halo inaugurasaun Sede ida ne’e.
“Ha’u ho Konsellu Suku tomak no Populasaun Suku Akadiru-Hun sira Sente kontente tebes, tanba ita inaugurasaun ona Sede Suku Akadiru-Hun ne’e, no durante sira mehi Sede Suku foun ne’ebé ohin loron finaliza inaugura ona”, nia hateten.
Nia hatutan, iha parte seluk sira triste, tanba buat barak no fasilidade balun maka meza, kadeira, armáriu no sel-seluk tan seidauk iha, ne’ebé ohin sira hato’o ona ba Autoridade Munisípiu Dili, hodi fasilita ba buat sira ne’ebé presiza.
Sede suku foun ne’e iha Kuartu haat, portantu total Populasaun iha Suku Akadiru-Hun hamutuk 3.845, no uma-kain hamutuk 2.35, no mós Aldeia hamutuk tolu kompostu husi Aldeia Bidik, Aldeia Nuu Dadak no Aldeia Kulu-Hun de Baixo.
“Ha’u-nia esperansa ba Sede foun katak hakarak ka lakohi ami hamutuk ho Komunidade tomak atu oinsá bele tau matan ba Sede suku ida ne’e hodi nune’e ita hotu bele tau matan, no aban-bairua se maka sai Xefe Suku karik tau matan hanesan buat hot-hotu ita haree”, nia hakotu.
928 total views, 9 views today
