DILI (Timor Post)- Karreta ho marka Triton, Xapa mátrikula 13410, ohin dadeer Madrugada tuku 3:00, hetan asidente ida iha area Bairru-Formoza nian, rezulta ema na’in-4 kanek grave.
Tuir Sidadaun, Joanina Freitas Belo, hatete karreta Triton ne’e, mai husi diresaun Hospital Nasional Guido Valadares (HNGV), hafoin to’o iha area Bairru-Formoza nian derepente hetan asidente.
“Asidente ami la haree ho matan, maibé ami rona ema hakilar no barullu hafoin sira hader sai mai haree vítima feto ida hetan grave husi ain, ne’e mak toba hela sai mai iha li’ur, nune’e na’in-tolu seluk grave ne’e iha hela karreta laran,” dehan nia ba Media online Timor Post, iha fatin akontesementu, Sábadu (30/07).
Nia dehan, tuir informasaun ne’ebé sira rona husi vítima ida, katak sira iha karreta Triton laran ne’e hamutuk na’in-5 no inklui mós ho kondutor, nune’e iha feto na’in-rua no iha mane na’in-tolu, maibé mane ida ho kanek kmaan, iha feto rua no mane rua mak grave.
Nia dehan, karreta Triton ne’e, mai husi Diresaun HNGV, derepente halai husi estrada públiku mai soke tan karreta Grand max ho xapa mátrikula 21291, ne’ebé ho kondisaun aat para hela iha bekel nia oin no konsege soke karreta ne’e no burus liu ba iha benkel laran.
“Iha akontesementu ne’e, ami kontaktu kedas ba iha parte Polísia no sira to’o iha fatin akontesementu, nune’e mós kontaktu kedas ba iha Ambulánsia hodi mai lori vítima sira ba iha HNGV”, nia hateten.
Tuir sira nia haree, na’in-rua mak grave liu no rua seluk ne’e grave natoon, ida seluk ne’e kanek kaman.
Enkuantu, vítima na’in-5 ne’e, agora iha hela HNGV hodi halo tratamentu.
Tuir observasaun Timor Post iha terrenu mais iha oras tuku 08:00 dadeer ne’e iha ona engarafamentu iha fatin akontesementu, nune’e parte PNTL mai kedas iha fatin ne’e hodi halo atuasaun.
1,325 total views, 6 views today
