DILI—Peskadór Justino Lopes ne’ebé ba tasi no la fila ba uma hahú iha loron 06/02/2020, mosu deskonfiansa tolu, entre ema mak oho soe ba tasi, mout-bele tanba korente tasi mak dada no lafaek mak haan duni.
Peskadór Justino (23) husi Suku Makili, Postu Atauru, Munisípiu Dili, hela iha Tasi Tolu. Nia ba hala’o atividade peska iha tasi area Kuarentena, Tasi Tolu, Dili, kinta kalan (06/02/2020), oras, tuku 19:00 Otl. To’o kalan boot Justino la fila ba uma.
Komandante Polísia Nasionál Timor Leste (PNTL), Munisipiu Dili, Armando Monteiro hatete, bainhira nia parte simu informasaun husi família no komunidade sira katak lafaek maka tata no lori lakon tiha Justino, ekipa husi Unidade Polísia Fronteira tún kedas ho ró ba tasi hodi buka tuir, to’o kalan hetan de’it Justino nia kalsa no kilat tasi iha tasi laran iha area Justino halo atividade peska ba.
Nune’e, Armando dehan, nia parte kontinua buka tuir Justino nia isin no sei halo investigasaun klean atu hatene kronolojia loloos husi akontesimentu ne’e.
Entretantu komunidade ida ne’ebé ba asiste ema buka tuir Justino iha tasi parte tasi tolu nian hatete, ema hotu bele dehan lafaek mak tata Justino, maibé presiza halo investigasaun klean tanba, bele mós loos, maibé mós bele ema maka oho so’e ba tasi ka fatin seluk, ou nia mout maka lafaek haan ka mout tanba korente tasi maka dada lakon tiha.
Tanba ne’e, komunidade ne’ebé lakohi fó sai nia identidade ba Timor Post subliña, tuir loloos polísia mós tenke halo investigasaun ba Justino nia kolega sira ne’ebé halo peska hamutuk, no husu informasaun klean liu tan husi família sira kona-ba Justino nia atividade lorloron.
Tuir observasaun Jornalista Timor Post iha loron Sábadu (08/02/2020) iha tasi area tasi tolu haktuir, espoza Justino Lopes ho naran Rita Marçal ho família inklui peskadór sira kontinua halo esforsu hotu inklui halo serimónia ritual ho fi’ar katak bele hetan hikas Justino nia isin mate.
Família sira mós husu ajuda ba Dreamers Dive Academy Timor Leste (DDATL) ne’ebé hala’o hela atividade treinu ba membru Dive foun iha tasi tolu hodi buka tuir Justino nia isin iha tasi laran.
Justino nia espoza Rita Marçal haktuir, Justino vítima sai husi uma objetivu ba luku mas too kalan boot la fila no família simu informasaun husi nia belun peskadór katak, lafaek mak tata no lori vítima nia isin tama tasi laran.
Justino sai husi uma, Rita haktuir, nia rasik hasé nia kaben atu labele ba halo atividade peska, tanba sente laran todan. Maibé, nia foti nia kilat ho pasta fila kotuk ba de’it tasi. (cao/ato)
838 total views, 3 views today
Bele hare Video Seluk :