Jornalista Jaime Pires / Editór Noémio Falcão
DILI (Timor Post)—Serimónia inaugurasaun postu polísia trânzitu hamutuk neen iha Dili laran implika engrafamentu iha sidade kapital kuaze loron tomak tanba serimónia halo iha estrada klaran taka ba movimentu públiku.
Hahú husi dader to’o lorokraik funsionáriu sira sai servisu mosu engrafamentu halo ema hotu preokupa no lansa krítika maka’as iha rede sosiál.
Maske nune’e, Primeiru Ministru (PM), Taur Matan Ruak mak asina plaka postu hirak ne’ebé konstroi ho orsamentu husi emprezáriu timoroan Salvador Mahoka.
Postu trânzitu hirak ne’e maioria iha sidade Dili sentral mak hanesan Bairu-Pite, Kolmera, Hotel Timor, Merkadu-Lama no Terminal Bekora.
Iha diskursu Taur fó parabéns ba Mahoka no husu ba kompañia lokál sira iha timor laran tomak bele banati tuir nu’udar kontribuisaun sidadaun ba nasaun.
Taur dehan, postu trânziru sira uluk Sekretáriu Estadu Formasaun Profisional no Empregu (SEFOPE) halo ne’e durasaun la naruk no presiza duni halo foun hanesan dadauk ne’e.
“Entaun ohin ha’u kontente loos, tanba hetan infraestrutura ida di’ak ne’ebé harii husi emprezáriu timoroan señór Mahoka, ho ida ne’e ha’u hakarak parabeniza nia, hu’u mós husu buat ne’ebé mak Mahoka halo ne’e bele sai hanesan banati ida hodi emprezáriu lokál sira hotu bele halo tuir,” Taur subliña iha nia diskursu Postu Trânzitu, Bairtu-Pite, Dili, Kuarta (13/10/2021).
Iha fatin hanesan, Komadante Jerál Polísia Nasionál Timor-Leste (PNTL), Komisariu Faustino da Costa hatete, nia lori instituisaun nia naran agradese ba Mahoka tanba ho laran luak bele tulun PNTL hodi halo konstrusaun Postu Trânzitu hirak ne’e.
“Ami hakarak hato’o ami nia agradesimentu ba Mahoka no mós Ministru Interior tanba bele halo infrastrutura ida ne’e hodi entraga ba PNTL liuhusi Trânzitu Rodoviaria hodi halo servisu durante oras 24 nia laran,” Komandante Faustino subliña iha nia diskursu.
Nune’e mós Diretor Kompañia Rudal, Salvador Mahoka hatete, halo postu Trânzitu ne’e la’ós buat boot ida maibé hanesan buat ki’ikoan ida, hodi kontribui ba dezenvolvimentu rai ida ne’e.
“Buat ne’ebé mak ha’u halo ne’e la’ós buat boot ida maibé buat ki’ikoan ida, ha’u halo buat ida ne’e tanba liuhusi buat ki’ikoan ne’ebé mak ha’u hetan, tanba hakarak halo ita nia dezenvolvimentu sai di’ak no furak presiza ita hotu hamutuk no ita nia kontribuisaun,” Mahoka subliña.
Enkuantu Postu Trânzitu ne’e harri iha fulan Marsu liubá, ho orsamentu no material inklui trabalador mai husi emprezáriu Mahoka.
1,012 total views, 9 views today
Bele hare Video Seluk :
Subscribe to Timorpost
