DILI (Timor Post)—Tribunál Distritál Dili (TDD), liu hosi audiénsia koletivu, labele halo julgamentu ba arguidu ACC, tanba deskonfia arguidu sofre moras mental no labele ko’alia, hafoin komete iha krime Omisídiu tentada hasoru Vítima JC iha Likisá.
Juis prezidente Koletivu, Ivan Antonino Suritai, hatete, tribunál labele halo julgamentu ho arguidu tanba tuir informasaun ne’ebé iha nota arguidu labele ko’alia ka komprende mós lingua Jestu (bahasa Isyarat).
“Tribunal labele halo julgamentu se arguidu rasik labele pronunsia buat ruma, tanba iha informasaun dehan sofre moras mental no mós arguidu bisu labele ko’alia hafoin komete kazu ida ne’e,” dehan Juis Ivan ba audiénsia hotu iha Sala julgamentu TDD, Kinta (30/09).
Juis prezide esplika katak tuir, lei hosi kódigu prosesu penal artigu 83 númeru 2 alínea B, fó dalan atu rona família besik reprezenta arguidu.
Maibé, arguidu nia aman rasik ne’ebé tribunal nomeia, labele introdús deklarasaun ruma kona bá prosesu.
Tribunal mós deside atu husu ba parte Médiku hosi Hospital Nasionál Guido Valadares atu halo teste médiku psikiator ida ba arguidu nia kondisaun, nune’e bele hatene katak arguidu sofre duni moras mental ka lae.
“Ami sei halo karta ida mak Hospital para bele halo teste psikiator ba arguidu, nia sofre duni moras mental no labele kolia ka lae, “dehan nia.
Tanba ne’e Tribunal sei fó prazu loron 10 nia laran atu família lori arguidu ba halo ezame psikiator.
Iha fatin hanesan, parte Ministériu Públiku reprezenta prokuradór Nelson Martins, konkorda ho desizaun Tribunal nian, atu halo ezame ba arguidu nia kondisaun ne’ebé deskonfia sofre moras mental no labele kolia.
Nune’e tribunal bele hatene, kuandu iha rejultadu mak identifika moras bele lao tuir dalan alternativu seluk, maibé kuandu arguidu laiha moras ruma mak tenke foti medida ruma.
Entretantu ba arguidu nia defeza, Defensór Rui Guterres, laiha pozisaun ka komentáriu, tanba mantein katak arguidu iha duni moras mental, no faktu hatudu kuandu arguidu marka prezensa iha tribunal mós arguidu tuur nonook, maski komprende ema kolia.
Ikus, aman hosi arguidu JCC, Sipriano Gonçalves, hatete, parte família prontu lori arguidu ba tuir ezame, tanba hatene katak durante ne’e hafoin arguidu lori tudik sona vítima, sofre kedas Bisu (ko’alia ladi’ak).
Sikun seluk kona bá prosesu akuzasaun, tribunal seidauk produs faktu tanba tribunal sei halo prosesu teste ezame psikiator ba arguidu nia kondisaun.
Maibé tuir informasaun ne’ebé timor post nota, katak kazu ne’e rejistu ho númeru prosesu 0071/20/LIBZT, ne’ebé akontese iha loron 04 fulan Juñu 2020, Aldeia Maumetalau, Suku Maumeta, Postu Bazartete munisípiu Likisá.
Ba audiénsia tribunál sei adia ba loron 09 Dezembru 2021, tuku 10:00 ne’ebé prezide hosi Juis koletivu kompostu, Juis Ana Paula, Ivan Antonino Suritai, ho Juiza Maria Solana. Enkuantu parte Ministériu Públiku reprezenta prokuradór nain ida no Defensór ida. (jxy)
952 total views, 3 views today
Bele hare Video Seluk :
Subscribe to Timorpost
