DILI (Timor Post)—Ministru Justisa, Manuel Cárceres da Costa ho komitiva dezloka ba munisípiu Covalima hodi abertura formasaun indusaun ba Guarda prizional sira iha estabelesimentu prizional Suai.
Formasaun ne’ebé hala’o iha Tersa-feira (07/09) ba Guarda Prizional sira ne’e, ho objetivu hodi hasa’e kapasidade Guarda Prizional sira nian hodi bele halo atendementu ne’ebé di’ak liután ba dadur sira ne’ebé kumpre sentensa iha estabelesimentu Prizional Suai.
Formadores ba formasaun ne’e mai Husi Komisaun Funsaun Publiku no Diresaun Nasionál Assesoria Jurídiku no Lejizlasaun Ministériu Justisa nian, no benefisiáriu ba formasaun ne’e mak guarda prizional 39, (Mane 36, feto 3).
Tuir Ajenda Formasaun inisiál ne’e sei hala’o durante loron hat no sei kontinua fali ho formasaun hanesan ba Guarda prizional iha estabelesimentu Gleno no Guarda Prizional Becora iha semana ikus fulan Setembru.
Partisipa mós iha abertura ne’e maka, Diretór Jerál no Nasionál iha ambitu Ministériu Justisa nian, Administradór Munisípiu Covalima, reprezentante Komandante PNTL Munisípiu Covalima.(*/teu)
340 total views, 3 views today
