Baukau(timorpost.com)—Koordenadór Partidu Libertasaun Popular (PLP), Munisípiu Baukau, Helder Freitas‘Kamarudin’, dehan komunidade sira labele fiar propaganda nune’e kontinua fó fiar ba Taur Matan Ruak, kontinua lidera governu tinan lima mai oin.
“Ha’u husu ba imi sira ne’ebé mak ohin mai partisipa kampaña ida ne’e orasida fila ba imi nia suku no aldeia sira kontinua organiza malu atu nune’e iha loron 21 fulan Maiu ita tenke rona rezultadu Baukau manan”, dehan Koordenadór PLP Baukau, Helder Freitas, liuhosi nia diskursu abertura kampaña ba Eleisaun Parlmentar, iha Darasula Suku Gariwai, Postu Administrativu Baukau Villa, Munisípiu Baukau, Tersa (19/04/2023).
Nia subliña, husik ba sira halo propaganda hodi atake Taur Matan Ruak, nia mak sei lori nia todan no aban bain rua se ba kumpre iha Maromak nia sorin, tanba ne’e imi lalika hakfodak no tauk ema halo propaganda sira tun sa’e.
“Ha’u ko’alia hanesan ne’e, tanba ita iha Baukau figura ida tinan 24 hela hamutuk ho ita mak hela úniku Taur Matan Ruak de’it ona, tanba ne’e mak ita tenke servisu maka’as no Jenerál Taur sei hamutuk ho ita lori Timor ba oin, la’ós atu ba kotuk”, nia hateten.
Helder reforsa, tanba hamutuk ho Taur Matan Ruak nunka hakfodak ho kualkér se de’it no prontu mate hamutuk ho Taur Matan Ruak, nune’e komunidade Baukau tenke firme hodi prontu hamutuk ho Taur Matan Ruak to’o mate.
“Maluk sira agora lalika hakfodak so uluk agora ita hosi loro monu no lorosa’e ita dasa ona, tanba ne’e iha loron votasaun ita tenke lori nafatin ita nia maun Taur Matan Ruak sei sai nafatin Primeiru Ministru ba tinan lima ba oin tan, ida ne’e mak ita nia hakarak”, nia esplika.
Tanba Taur Matan Ruak, foin daudaun ukun ne’e iha situasaun ida ne’ebé mak difisil maibé la monu, maski nia ukun ho kadeira ualu de’it maibé ukun to’o remata, kuandu partidu seluk mak kadeira ki’ikoan mak ukun hanesan ne’e monu kedas iha dalan klaran.
Ho ida ne’e nia kontinua husu ba militante no simpatizante sira partidu PLP nian ne’ebé mak ohin partisipa kampaña abertura ne’e, kuandu fila ba uma karik lalika ta’uk tanba, Taur Matan Ruak nia prinsípiu sei la hakiduk ba ema ida hodi kontinua servi povu no rai ida ne’e nune’e mós lori povu husi mukit no kiak.
“Ema mai ameasa ita iha Baukau laran kintu kantu fó sai hanesan ne’e husik ba imi lalika rona ida, sira mós lalika mehi katak Baukau partidu seluk mak mai atu manan, tanba uluk ita sai segundu lugar agora ita sei sai primeiru lugar ida ne’e mak ita nia hakarak”, Nia deklara.
Nia mós husu ba militante sira PLP nian atu lalika hakfodak ba sira ne’ebé mak halai sai ona husi partidu PLP, tanba ne’e mak nia parte ohin hamriik hodi responde sira ne’ebé mak halai sai ona hosi partidu depois ba ko’alia at Taur Matan Ruak.
“Tanba ne’e husik ba sira halo no trata ba Maromak sei responde sira nia hahalok ne’e, ba matebian sira ne’ebé mak mate ona sira mós sei haree tuir, karik Taur Matan Ruak la halo sakrifísiu ba nasaun ida ne’e entaun saida mak sira ko’alia ne’e loos, maibé Taur mós halo sakrifísiu ba rai ida ne’e mak matebian sira sei liki sira”, nia hakotu.
1,623 total views, 3 views today
Bele hare Video Seluk :
Subscribe to Timorpost
