BAUKAU—Hahú kedas moras da’et hanaran corona invade tama iha nasaun viziñu Indonézia no Austrália, lia nain timoroan sira hahú halo serimónia ritual iha munisípiu sira ho intensaun hamulak ba lulik sira hotu iha Timor ho matebian sira atu sata netik atake virus ne’e tama territóriu.
Iha loron 12 Abril 2020, lia nain husi Suku Loilubo Postu Administrativu Vemasse Munisiíiu Baukau hala’o serimónia ritual aleinde husu tulun hodi salva timoroan sira iha rai laran, husu mós atu hadok timoroan sira iha rai liur ne’ebé la konsege fila tanba desizaun estadu iha rai ida-idak aplika estadu emerjénsia nu’udar meius prevene moras perigozu ne’e nia da’et.
“Ami halibur hamutuk hodi taka moras COVID-19 ne’ebé daudaun nee daet iha mundu tomak liuliu ba ita nian rai Timor Leste,” ba Timor Post Lia Nain Suku Loilubo, Tito Xavier Freitas iha fatin ritual, Domingu (12/04/2020).
Nia haktuir, iha tinan 1820 bainhira pesti ida invade populasaun barak mak mate no beiala sira halo kultura nee hodi satan moras refere, tanba nee mak liu husi virus korona neebe daudaun nee komesa tama ona mai Timor Leste ho ritual ida hodi tahan no satan netik.
Tito mos hatutan, fatin ida hanesan fatin kultura nian, tan nee mak presiza husu tulun husi Natureza, beiala matebian sira inklui mos maromak liu husi mahein São Sebastiao Ossoqueli nian.
“Ami hamulak nee ba Timor tomak inklui mos ita nia Timoroan sira neebe servisu iha ema nia rain atu hadook sira husi moraska pesti korona virus nee,” nia dehan.
Observasaun Timor Post nian nota katak iha ritual nee lia nain sira hamulak hodi manu Timor nian lima, ida husik moris no haat seluk oho hodi oferese ba beiala sira atu tahan moras refere labele tama mai Timor Leste.
Iha mos bua no malus hanesan matak malirin hodi kose ba isin tomak atu satan COVID-19. Inklui mos surik no diman.
Partisipa iha serimonia kutural refere Atoridade lokal, lia nain sira inklui komunidade balun.
Entretantu Timor Leste rejista tiha ona pasiente ne’ebé pozetivu hetan virus corona (COVID-19) hamutuk na’in rua. Nain ida estranjeiru ne’ebé hahú izola iha loron 21 Marsu rekopera fali ona, no iha loron 09/04/2020 timoroan ida nu’udar estudante foin fila husi Indonézia identifika pozetivu ba moras da’et ne’e no kumpri ona izolamentu iha Sentru Saúde Vera Kruz, Dili. (mj3)
485 total views, 3 views today
