DILI (Timor Post) – Ministru Obras Públika (MOP), Abel Pires, hatete iha fulan Outubru nia laran projetu estrada Diresaun Postu Administrativu Laga ba Baguia inklui Kelikai, Munisípiu Baukau nian hahú halo lansamentu.
“Estrada Laga ba Baguia iha Segunda ne’e sira loke ona proposta finanseiru ne’ebé iha ona kompañia ida mak bele manán, maibé ha’u labele pronunsia tanba ida ne’e servisu Komisaun Nasionál Aprovizionamentu (CNA), ninian,” dehan Ministru Obras Públika, Abel Pires, iha Palásiu Governu, Kuarta (24/08).
Nia dehan, iha tempu besik ne’e nia laran parte CNA, sei pronunsia sai ona kompañia ida ne’ebé manan projetu estrada diresaun Laga ba Baguia inklui Kelikai ninian.
“Diresaun ba Kelikai nian ne’e ha’u la lembra kompañia ne’e nia naran, maibé kompañia ida kaer estrada munisípiu Aileu ba Ainaru ne’e mak manan,” hateten nia.
Nia reforsa, tanba agora hahú husi ne’e ba oin tenke halo tan prosesu rua, ida fali fasil tanba aprova husi Konsellu Ministru, maibé ida seluk ne’e difisil tanba tenke Kámara de Kontas mak aprova ka fó vistu.
“Tanba ne’e ha’u hanoin se prosesu la’o hanesan uluk ha’u ko’alia ne’e iha fulan Outubru tinan 2022, obra bele hahú ona, ne’ebé ita hein prosesu ne’e la’o hela,” deklara nia.
Ikus nia dehan, kona-ba fó indeminizasaun ba komunidade sira iha estrada ibun ne’e, sira-nia parte servisu hela no sente di’ak hela, tanba ida ne’e Ministériu nia servisu fasil, maibé antesipa hela.
2,647 total views, 3 views today
