Jornalista Caetano Guterres / Editór Noémio Falcão
Baukau (Timor Post)—Programa Nasionál Dezenvolvimentu Suku (PNDS) harii uma tolu ba populasaun kbiit laek (Uma Kbi’it Laek/UKL) iha Aldeia Asanunu, Suku Soba, Postu Administrativu Laga, Munisípiu Baukau pendente tanba laiha estrada.
Xefe Suku Soba, Francisca Monica de Fátima Soares ba Timor Post, Sábadu (18/12/2021) haktuir, ekipa PNDS rasik servisu hamutuk ho autoridade lokál identifika ona populasaun kbiit la’ek, maibé labele halo implementasaun iha tinan 2021 no muda fali ba 2022.
Francisca hatete, atu harii uma presiza estrada hodi fasilita kompañia sira ne’ebé atu transporta material to’o fatin. Tanba ne’e, nia hatutan, bainhira laiha estrada susar tebes.
“Bainhira karreta lori sasan hatun iha mota sorin mak komunidade lalin, ne’e mos persiza osan,” Francisca via telefone.
Francisca dehan, nia parte halo ona kontaktu ho Institutu Jestaun Ekipamentu (IJE) atu loke uluk estrada molok harii uma ba kbiit laek.
1,140 total views, 3 views today
